Roland Croes, director di SETAR NV:
*Clientela di pay.aw a aumenta cu 108%
ORANJESTAD (AAN) – Ing. Roland Croes, director di SETAR NV, durante e conferencia di prensa pa anuncia e sistema nobo di pago pa e clientenan di ELMAR cu tin meter pre-pago, tambe a hiba palabra, relaciona cu e lazo di cooperacion entre ambos compania pa realiza e avance aki.
Croes a bisa cu pa su persona y e team di Setar tambe ta un momento hopi bunita di a cera un cooperacion cu NV Elmar awo. Esaki ta un proyecto cu a wordo discuti pa basta tempo, y pa Setar pay.aw ta un di e proyectonan cu pa hopi tempo nan tabata kier, pasobra e ta un di e servicionan cu nos ta haya cu directamente, ta nifica un aumento di e bon experiencia cu e cliente ta bay ripara.
“Cu bo por recarga bo coriente 24/7 y cu ta tuma lugar instantaneo y por uz’e tambe, ta un di e hechonan cu nos ta kere cu pay.aw a wordo traha p’e”, Ing. Croes a menciona.
El a agrega cu bunita ta cu tin mas compania ta usando e sistema aki manera Arugas, Aruparking, y tambe pa cumpra fuel y gasoline.
Ing. Roland Lacle e menciona tambe cu mientras tanto, loke a wordo cumpra na pay.aw pa aña ta yegando diez miyon florin. E compra di producto cu ta wordo paga na pay.aw ta creciendo y e clientela a subi cu 108%, di December 2022 pa December 2023.
“Nos ta sigur cu manera nos ta desaroyando e producto, e lo sigui crece. Nos tin un compania hopi grandi, aworaki, cu ta interesa pa ora nan trahadornan tin cu cumpra fuel, of tin cu staciona den caya, of ora e trahadornan traha overtime y tin cu come, etc., bo por como compania, centralmente, duna e companianan e cen anto administracion ta set up”, Croes a menciona.
El a referi na e rij largo di hende dilanti di Oficina di Impuesto pa paga belasting di plachi number, y SETAR ta den discusion cu DIMP pa clientenan por paga usando en principio pay.aw. “Nos por automatiza full e sistema y hasta bisa bo na unda bo por busc’e”, director di SETAR a splica, entre otro.
El a subraya cu e ta hopi contento cu SETAR ta cerca di e tecnologianan full moderno, pa yuda ELMAR avanza.
