Minister Ursell Arends:
ORANJESTAD (AAN) E instancia cu ta recoge carcas (cadaver di pushi y cacho) rond di Aruba, ta Serlimar. Minister Ursell Arends, Titular di Medio Ambiente, a indica esaki den entrevista cu DIARIO.
E mandatario a reitera cu Serlimar ta e departamento designa pa haci esaki. “Pero ya a bira un custumber caba cu pa decadanan, hende a custumbra dera cacho y pushi den Santana di Cacho, y Departamentonan di Naturaleza tambe cu ta cay bao di Ministerio di Naturaleza, ya caba den pasado a produci informacionnan pa alerta e instancia y departamentonan di infrastructura, kico ta tumando lugar. Y mi ta kere cu esaki tanto Departamento DNM a señala esaki den pasado, manda cartanan p’asina aki informa DIP y DOW kico ta tumando lugar, y mi ta kere ta importante pa e departamentonan concerni por move riba esaki, pa coregi’e”, Arends a bisa.
E dignatario a expresa cu e no ta mira cu esaki ta un problema solamente mirando cu tin un hotel ta bay habri, pero e ta kere cu pa henter pueblo di Aruba, pa nos mesun hendenan. “Y si nos kier haci un cambio na algo, tin cu cuminza pa nos mes hendenan”, e mandatario a reitera.
El a menciona otro situacion cu tin, mirando cu e hotel (Secrets) tin conecta cu RWZI na Zeewijk, y eynan tambe mester core tuberianan pa por conecta full Sero Colorado na RWZI, y esaki ta unda e trabaonan ta cuminza tuma lugar, y akinan tambe mester cana man den man cu naturaleza.
“Mi ta na haltura di e situacion aki y loke si mi no ta na haltura ta si tin otro commitment di otro departamento di gobierno of ministernan, duna riba e tereno aki. Pero den e ministerio di naturaleza si nos lo zorg pa esaki por cana manera e ley ta prescribi y drecha e area aki pa nos mes hendenan, y tambe pa nos por tin un area limpi”, Minister Arends a subraya.
