Concenshi humano mester proteha industria di turismo
*Economia Caribense ta confronta su enemigo natural anual
ORANJESTAD (AAN) — Segun pronosticonan oficial cu a wordo haci dor di National Hurricane Center, cu ta e centro di cooperacion di henter region di Caribe y Atlantico riba tereno di condicionnan di tempo, na 2024 mester a prepara pa un temporada di horcan sumamente peligroso.
Ora National Hurricane Center a haci e pronostico aki, no solamente mester tene cuenta cu e cantidad di sistemanan cu lo surgi, pero e peligronan cu nan lo encera pa bienestar directo di hende den tur aspecto cu ta dicidi pa bida y calidad di bida pa hende.
Si ora papia di arsenal di guera cu hende ta capaz di fabrica na mundo, tur hende ta cuminsa tembla, ora papia di sistemanan tropical cu ta desaroya, un cantidad demasiado grandi di hende cu ta biba ainda den fantasia cu “nada por pasa”, ta percura pa condicionnan cu no solamente ta pone nan propio persona, pero bida di cantidad di otro hende na peliger.
E realidad di mundo moderno, den cual consumo ta central, ta forma uno di e peligronan mas grandi pa entre otro region di Caribe den e amenaza di horcan, cu hende no por vence.
Kico horcan por haci cu economia Caribense, a keda demostra lamentablemente anualmente, na momento cu un horcan pasa ariba un isla Caribense of efectonan di un horcan causa tragedia den region di Caribe, cu ta depende pa un gran parti di turismo, cu ta stimula e produccion di peligro pa un pais.
Aki mester para keto na dos produccuion opositor di turismo, cu por bira alma di un economia manera ta e realidad na Aruba, pero na mes momento por produci peligronan sumamente grandi, si na momento cu sistemanan natural bira peligro, no tuma medidanan cu mester wordo tuma.
Ora alarma di horcan wordo bati, e beachnan bunita di Aruba, cu ta base di economia, ta wordo azota pa biento, cu ta comberti laman den furia!
Pasashi di sistemanan tropical cu mester wordo considera “debil”ya ta duna prueba con laman ta debolbe hende tur loke hende depone den laman,
Mas forza un sistema tropical tin, mas forza e tin tambe pa deposita loke tin den fondo di laman na tera.
Esaki ta uno di e preocupacionnan grandi na paisnan, caminda laman ta depone riba beachnan material peligroso cu hende ta depone den laman como sushi of cu ta resulta pa motibo di biento of yobida den laman.
Na momento cu alarma di un tormenta of horcan wordo bati, ta pidi tur hende pa deshaci di sushedad, obhetonan peligroso cu tin riba nan terenonan, y tur loke biento por transporta pero tambe por cambia di lugar den awacero torencial cu ta deposita loke ta riba tera den laman.
E mundo moderno ta maestro den produccion di materia peligroso, cu durante yobida pisa ta resulta den laman.
Pero mundo moderno tambe den asuntonan cu e mester ta sabi, ta demasiado bobo pa admiti kico forza di biento por produci.
Den temporada di horcan ta papia di forza di biento, cu ta e nucleo di e peligro y ta dicidi con peligroso pasashi di un sistema lo ta.
Biento ta dicidi pa laman bruto. Biento ta dicidi si dak ta keda riba cas., Biento ta dicidi si e ta bolter un boto riba laman. Biento ta dicidi si un sistema ta wordo considera ola tropical, tormenta, horcan of horcan mayor.
Hende no tin forza pa keda riba pia den un biento fuerte. Boto ta bira juguete di biento den laman, cu biento ta domina.
Prome cu papia di e factor material, contempla e bida di hende cu autoridad na momento di horcan ta, y cu ta wordo pone na peligro pa cumpli cu nan responsabilidad pa bienestar di comunidad.
Economia di Aruba ta basa riba turismo cu naturaleza ta haci posibel. Economia di Aruba ta depende di e sano huicio di hende cu mester admiti cu e no por midi forza cu naturaleza.
Prueba cu naturaleza ta haci loke e kier ta keda entrega awe na lectornan cu diripiente ta mira cinco posibel sistema tropical riba mapa di e region Atlantico.
Ningun ta un amenaza pa Aruba, manera nan posicion awor ta indica pero si ta duna prueba cu diripiente e situacion trankil den region di Caribe a sufri cambio.
Concenshi humano awe mester proteha industria turistico di Aruba, cu ta conoci cu efectonan di ola tropical, cu ta e sistema tropical mas debil pero cu tambe na 2023 a wordo afecta pa un tormenta tropical cu no a alcansa su maximo na Aruba pero despues a destrui otro paisnan.
September a haci su entrada na e paraiso turistico Aruba, cu awor mester defende su economia, su bienestar, bida di su habitantenan y bishitantenan, cu ta depende tambe di su comportacion, su grado di responsabilidad enfrente su pais.
