Tres aña despues cu Covid-19 a cera porta di Misa rond mundo
- Economia mundial ta depende awor di crimen di guera
- Comunidadnan claba na cruz dor di hende sin concenshi
ORANJESTAD (AAN)- Diabierna 10 di April 2020 tabata un dia historico pa mundo. El a anuncia inicio di e fin di siman di Pasco Grandi, den cual kloknan a bati den Misa bashi di Aruba.
E ser humano mester a lucha contra un virus, cu no a haci distincion den raza, religion, nacionalidad, rico y pober. Covid-19 a presenta su mes pa destrui comunidad mundial na forma directo y indirecto.
Resultado tabata cu tur hende mester a evita contacto loke a haci cu placa a stop di lora rond mundo, cu a conoce situacionnan den cual gobiernonan mester a duna empresanan placa pa keda habri y evita cu hende ta muri di hamber na paisnan cu un economia di nivel halto.
Na paisnan pober, e desastre humano tabata mas grandi pa condicionnan di bida cu no tabata permiti gasto pa awa, cuminda ni bacuna.
Pa milagro mundo a sobrevivi aunke na paisnan dictatorial nunca a bira conoci cuanto hende te ainda ta muri di Covid-19 cu ainda ta mata hende rond mundo.
Pero awe no tin atencion mas pa Covid-19 pasobra hende pio cu e Coronavirus nobo, ta mata y ta destrui sin cu mundo por pone un fin y bisa cu ta basta.
Con mundo por observa Semana Santa sin habri boca y protesta contra e sumanan enorme cu ta wordo kita for di boca di hende, pa sostene compra di arma y sigui mata hende?
Con cualkier religion autentico cu no ta fantasia di paisnan dictador manera Rusia cu a manipula cu religion, awe no ta hisa cara y busca cielo den loke ta pasa cu hende na mundo?
Kico a pasa cu felicidad di hende? Kico a pasa cu balor di hende?
Con por celebra Semana Santa cu ta e observacion di e forma cu un hende inocente a wordo destrui?
Kico ta e contenido di concenshi cu nos kier entrega muchanan cu ta crece den un comunidad mundial, caminda mas placa ta wordo gasta na crueldad cu na prosperidad di e ser humano?
Con por ta posibel cu Comunistanan cu ta trapa riba religion, awe tin sosten di hende cu ta bisa cu nan ta kere den Dios?
Nos ta bida den un mundo, cu un hende cu concenshi mester evita di mira noticia pa e por sinta na mesa y come.
Cuminda tin problema pa pasa den garganta ora mira matansa di inocentenan dor di hende cu a horta placa y bienestar di pobernan pa e por bira grandi y yama su mes lider.
Awe for di momento cu e Coronavirus nobo a presenta pa destrui hende, Semana Santa na un cantidad di pais ta wordo observa atrobe cu costumbernan cu a wordo silencia.
Costumbernan y tradicionnan cu mester pone hende e dolor cu hende ta causa hende. Si hende no por mira esaki, si hende no por realisa con e por pone hende sufri, con hende por bay yora na pia di un cruz sin wordo yama hipocrita?
Tristo ta, cu e cadena destructivo ta propaga su mes.
Nos ta bolbe na Covid-19. Pasobra mester a tuma medida, economia a wordo kibra y hende no tabata tin trabou, loke a nifica cu hende no tin placa pa come y tene nan mes na bida.
Hende ta destrui su mes finalmente si e destrui otro. E ta biba cu miedo pa su enemigo, cu e mes ta crea. E ta biba cu miedo pa come su pan, pasobra e por tin veneno. E tin miedo di yama un hende su amigo. E no conoce felicidad.
Analisis den periodismo ta sirbi pa elevacion di hende. Un periodista ta analisa pa splica publico kico ta na su bienestar y kico ta destrui su bienestar.
Pa medio di investigacion pa traha un analisis, nos ta educa nos mes diariamente tambe.
Awe ora nos pone e realidadnan cu nos mester presenta na Pueblo dilanti, nos no tin conclusion pero nos ta keda atras cu un pregunta grandi.
Placa sushi manera di Putin, ta capaz pa destrui nos tur of nos ta cuminsa practica honestidad y uza nos concenshi y evita cu Putin ta na poder?
Nos ta sigui bati man y coopera den Nacionnan Uni cu e luna aki tin Rusia como Presidente di su Conseho di Seguridad?
Nos ta celebra Semana Santa pasobra nan a mata un inocente of nos ta actua contra loke ta mata inocente?
Aruba ta prepara pa culminacion di un siman sagrado pa e Arubiano. Ohala e fervor di e Arubiano, por contagia tur hende pa un mundo nobo bira realidad y deshaci cu menasa di hasta un Guera Mundial.
