ORANJESTAD (AAN): Despues cu Diabierna parlamentarionan a huramenta na Cas di Gobernador, DIARIO a entrevista parlamentario nobo di MEP Alvin Molina.
Na prome lugar el a gradici Dios pa su salud y salud di tur hende y el a pidi Dios tambe pa sabiduria pa e temponan nos dilanti.
“Mi ta gradici tambe partido Movimiento Electoral di Pueblo pa e confianza y e oportunidad cu nan a brinda nami”.
Mi kier duna danki tambe na e team cu a sostenemi (“A-Team”) durante e campaña y Aruba en general cu a habri porta pami, segun Molina.
DIARIO a puntra e ex polis si e tabata tin e deseo basta tempo caba pa drenta politica.
El a bisa cu e tin mas cu 20 aña den Cuerpo Policial y cu nunca e no a pensa di sali for di KPA, mirando cu e tabata gusta su trabao y gusta sirbi pueblo.
“Sinembargo despues di 20 aña den tur tipo di funcion di manager, mi a ripara cu tin hopi otro forma pa traha mas ainda riba seguridad di Aruba, pasobra pami seguridad ta mas cu solamente husticia, segun Molina.
El a splica cu ora cu el a wordo acerca pa subi e lista geel, el a pensa cu quizas esey ta un bon manera pa traha mas ainda riba seguridad di Aruba.
Molina a bisa tambe cu den Parlamento tur hende mester por ta critico y ta tene otro skerpi, pero semper cu e mesun meta di mehoracion di Aruba.
