Dahariana Evertsz, Health Promotion di DVG:
*Ta resalta e edad di 18 pa 29 aña
ORANJESTAD (AAN) Apart di e cifranan tocante sobrepeso y obesidad na Aruba, e rapport STEPS ta mustra cu tin consumo di alcohol den exceso, den nos poblacion.
Dahariana Evertsz, funcionario di DVG encarga cu Promocion di Salud (Health Promotion) a elabora riba e tema, agregando cu tambe tin demasiado uso di vaping.
“Dus, normalmente, durante e temporada di carnaval, campamento, ora cu Pasco ta na porta, nos semper ta bisa cu nos ta compronde cu hende ta bebe alcohol. Nos ta hende grandi. Normalmente un hende muher mag bebe un glas di alcohol pa dia, e hende homber ta maximo dos glas. Den e cifranan di exceso nos ta wak cu un hende muher, normalmente ta bebe 3.3 glas cada bez, y hende homber ta 6 glas cada bez. Esey kiermen, cu e consumo aki, aunke e encuesta a wordo haci den luna di Maart te cu summer aña pasa, toch e uso di alcohol no a baha”, Dahariana Evertsz a indica.
El a agrega cu no por bisa su durante carnaval of campamento nos hendenan ta bebe mas hopi. “No, e uso ta henter aña door y e consumo ta hopi. Y no por papia cu ta un diabierna of un diasabra so, pero ta full e siman door! Y esey ta pasando pa hende muher y pa hende homber. E cifranan aki ta pone nos, como Salud Publico, pero tambe tur nos colaboradornan cu ta riba Plataforma Salud para keto pa wak den kico tur nos tin cu traha hunto riba dje, vooral den e parti di consumo di alcohol y vaping. E cifranan di vaping tambe ta hopi alarmante. Pues e organizacion FADA cu nos, mester traha hunto riba diferente campaña pa por crea prevencion y tambe limita e uso di alcohol”, Dahariana Evertz a remarca.
Den e uso di alcohol y vaping ta esnan den edad di 18 te cu 29 aña ta esnan mas alarmante. Y banda di nan tin esnan di 45 aña bay ariba tambe.
“Pero un cos cu si nos por a nota ta cu esnan di edad mas grandi, dus si nos pone hendenan di 50 aña bay ariba, ta hendenan cu semper ta wordo diagnostica caba cu algo. Pues, nan ta un tiki mas conciente y alerta pa nan estado di salud, y mas conciente caba cu cierto habitonan cu nan mester a cambia. “Mi ta kere, hopi biaha hendenan jong tin e mentalidad cu nan tin full e resto di nan bida pa drecha, pero si nos wak pa nan cuminza drecha for di aworaki y enfoca mas riba esnan mas jong ainda, si nos crea e habitonan bon desde mucha y mantene esakinan na hoben, ora bo tin edad mas grandi bo no bay tin e problemanan aki, bo no ta bay tin adiccion na alcohol of vaping, etc.”, Asina Dahariana Evertsz a señala.
