Banco Central di Aruba:
ORANJESTAD (AAN): Banco Central di Aruba (BCA) a publica e di diesdos edicion di su FINANCIAL SECTOR SUPERVISION REPORT (e asina yama “FSSR”) anual.
E Financial Sector Supervision Report di 2023 ta ofrece un bista detaya riba e implementacion di e ordenansanan nacional di supervision asigna na BCA cu ta regula e sector financiero y e cambionan riba tereno di regulacion y supervision, como tambe un bista general di e desaroyonan principal den e sector financiero di Aruba.
Segun e datonan di 2023, e sectornan bou supervision a keda sumamente solido y rendabel. Ademas, a logra progreso significante den fortifica e resiliencia di e sector financiero y amplia e marco legal di supervision y regulacion riba e terenonan di pago, conducta di mercado y inclusion financiero.
Perspectiva economico
BCA ta di opinion cu e perspectiva economico pa Aruba ta keda favorabel, primordialmente door di desaroyonan vigoroso den e sector di turismo. E indicadornan macroeconomico y monetario fuerte ta demostra Aruba su resiliencia na shocknan externo manera e pandemia di COVID-19. Alabes, e desaroyonan economico positivo ta refleha den e tasanan prudencial robusto di e sector financiero.
E buffernan financiero amplio cu banconan y otro institucionnan bou supervision mester mantene a demostra di ta sumamente instrumental den mantene e sector financiero sigur y solido. Sinembargo, no mester tuma stabilidad financiero como dimes, specialmente den e contexto di mercadonan financiero cu ta mas volatil y riesgonan emergente cu ta inclui crimen cibernetico, cambionan climatico y e avancenan rapido den tecnologia digital.
Mientras cu e tecnologia digital ta bin cu oportunidadnan, semper mester considera riesgonan potencial y maneha cu hopi cautela.
Reforsando e resiliencia di e sector financiero
Durante añanan, Aruba su sector financiero a demostra di ta sumamente resiliente na shocknan externo, incluyendo e pandemia di COVID-19, manera refleha den su rendimento fuerte. Normanan internacional y riesgonan asocia na un economia basa principalmente riba un pilar, como tambe e lesnan siña di e recien turbulencia den e mercado bancario di Merca y Suisa, a pone cu BCA a sigui fortifica e regimen prudencial cu ta goberna e sectornan bancario, di seguro di bida y fondonan di pensioen. E decision di BCA pa subi e rekisito minimo di solvencia of tasa di cobertura di e institucionnan aki lo fortifica e resilencia di e sectornan aki contra shocknan externo.
Amplia y reforsa e marco legislativo
Progreso significante a tuma lugar den diseña e areglo di garantia riba depositonan (e asina yama "deposit insurance scheme" (DIS)). Tambe, a establece un marco legislativo pa otorga licencia y supervisa proveedornan di servicio di pago y proveedornan di sistema di pago. Ademas, cu e bista pa fomenta inclusion financiero, BCA a entrega un proposicion legislativo na Minister di Asunto Economico, pa introduci e derecho legal pa tin un cuenta bancario basico bou di cierto condicionnan.
E proposicion aki tin como meta pa mehora e accesibilidad na productonan bancario basico, manera un cuenta coriente pa por haci pagonan domestico, cu ta esencial den e participacion di e individuo den un economia cu mas y mas ta sigui digitalisa.
Ademas, e Ordenansa Nacional di Credito na Consumidor nobo lo proteha mihor e consumidor cu ta sera un contracto di prestamo cu un banco of un otro proveedor di credito na consumidor door di, entre otro, determina un maximo na e tasa di interes riba prestamo di consumidor, preveni debe exceso y establece reglanan cu ta fomenta transparencia den e area di tarifa y otro gastonan involvi den e prestamo.
Di cuatro tanda di CFATF su rapport di e evaluacion mutuo di Aruba
E di cuatro tanda di CFATF su rapport di e evaluacion mutuo (e asina yama "Mutual Evaluation Report" (MER)) di Aruba a accentua Aruba su exito den establece un marco di AML/CFT efectivo y e efectividad di BCA su manera di traha basa riba riesgo (e asina yama “risk-based approach”). Sinembargo, mehoracionnan adicional ta necesario pa por cumpli completamente cu e recomendacionnan di FATF pa preveni y combati labamento di placa, financiamento di terorismo y di proliferacion di armanan di destruccion masivo. Den bista di esaki, BCA a prepara un plan di accion pa asina implementa efectivamente e recommendacionnan di CFATF-MER cu ta cay bou di su dominio. E ehecucion di e plan aki a cuminsa na 2023 y ta den ehecucion.
Mehorando e supervision di seguridad cibernetico
E sector financiero ta enfrenta un aumento den e riesgonan di seguridad cibernetico cual ta demostra den e subida den e cantidad di atakenan cibernetico mundialmente. Teniendo cuenta cu esaki, BCA lo sigui intensifica su supervision riba e cumplimento cu e marconan di seguridad cibernetico estableci na e institucionnan financiero.
Operacionnan cu ta sigur y confiabel ta rekeri tambe e implementacion di manehonan, proceduranan y medidanan relata na seguridad di Informacion di Tecnologia (IT) na e institucionnan financiero bou supervision.
BCA su documentonan di maneho relata na tecnologia ta forma e parametro pa asesora e cumplimento cu e marco di seguridad di IT na e institucionnan aki. Ademas, como tambe den consideracion cu e revision di e principionan basico pa un supervision bancario efectivo emeti door di Basel Committee on Banking Supervision na april 2024, BCA tin planea pa duna mas guia pa sigura un maneho solido di e riesgonan operacional na e institucionnan financiero bou supervision den e siguiente añanan.
Riesgo climatico
BCA ta indica cu e cambionan climatico ta un preocupacion creciente pa Aruba, specialmente relaciona ca e subida di nivel di lama y e impacto negativo cu esaki por tin riba Aruba su economia y, cu ne, e sector financiero.
BCA ta reconoce e necesidad pa emeti recomendacionnan di maneho y notanan di guia den e siguiente añanan pa promove concientisacion di e riesgo emergente aki cu e institucionnan financiero bou supervision tambe ta expone na dje.
Pa conclui, BCA ta mantene firme su compromiso pa sigui fomenta un sector financiero solido y di bon reputacion door di aplica un acercamento cu vision pa futuro. A lo largo, semper ta miho pa preveni cu lamenta. Un sector financiero sano y solido ta vital pa mantene stabilidad financiero na nos isla, cu ta un condicion esencial pa crecemento economico sostenibel.
E FINANCIAL SECTOR SUPERVISION REPORT 2023 ta disponibel riba e website di BCA www.cbaruba.org.
