Hose Figaroa di FTA
- E ta pushando dificultad riba otro trahadonan
- Tin di bay reuni oficialmente pa haya claridad
ORANJESTAD (AAN): Tur hende ta kehando cu tin scarsedad di trahador. Na diferente occasion ta organizando “Feria” pa purba atrae empleado. Tin keho cu salario abao ainda ta un obstaculo grandi.
Tin hende cu ta trahado na un restaurant, cu ta bay cas cada luna cu salario grandi danki na tips. Pero tin otronan cu ta cobra keto bay salario extremadamente abao. Esaki no ta yuda pa atrae trahado nobo.
Awor Hose Figaroa di Federacion di Trahadonan di Aruba (FTA) a splica den un entrevista cu DIARIO a indica cu el a combersa cu director di ATIA, y cu nan portanan ta habri pa yega na un reunion, como tambe Minister di Labor, durante evento di International Labour Organization (ILO) y a pesar cu nan a papia riba situacionnan laboral na Aruba den un manera no oficial, como tambe cu directora di DIMAS. E ta kere cu a yega ora pa nan reuni oficialmente pa asina haya claridad riba e situacion.
FTA no ta nenga cu Aruba tin un necesidad pa trahado, y esaki ta algo cu mester deal cu ne a corto plaso, pasobra un keho cu FTA ta hayando di nan miembronan ta cu door di falta di trahado, nan ta trahando hopi ora adicional y e trabao ta bira mas pisa, pasobra tin menos hende pa haci e trabaonan,
Ademas ta sumamente importante pa normalisa e situacion door di yena cuponan habri, pero na mesun momento, mester evita door di bay tuma pasonan sin pensa bon y tin un regulacion corecto, lo crea espacio pa haci abuso di e oportunidadnan di importa trahadonan. Mester wak con pa maneha esaki cu hopi cautela.
Sindicato FTA por a compronde cu Gobierno kier bin cu un dialogo general, entre otro, riba e situacion laboral di Aruba, pero e no ta kere cu mester warda. Como sindicato, FTA ta representa gran parti di e trahadonan den sector hotelero, y ta eynan mes na unda tin e presion mas halto den momentonan aki.
FTA mes a dicidi di cuminsa acerca diferente departamento di Gobierno pa un reunion, y si tin dialogo general, nan lo ta habri pa esaki, pa motibo cu e ta caminda ideal pa yega na un solucion na e situacion. Nan lo trece nan preocupacionnan y pa scucha tambe e escenarionan cu nan lo trece presenta. Figaroa ta kere ta importante pa no keda solamente indica kico e problema ta, pero tambe discuti riba kico ta e posibel solucionnan. Indica un problema ta facil, pero e triki ta aporta pa yega na un solucion.
