ORANJESTAD (AAN): E tan spera Savaneta Seafood Festival ta tuma luga e diadomingo aki,
y Ministerio di Finansas, Asuntonan Economico y Sector Primario ta orguyoso pa duna su apoyo completo na e evento importante aki.
Organisa pa Fundacion Savaneta Prome Capital y cu sosten di nos ministerio, ATA y Cede Aruba, e festival lo tuma luga dia 28 di september 2025 di 2:00 p.m. te 9:00 p.m., na pier di Brisas del Mar.
Por spera un variedad di seafood local, for di pisca fresco di dia te plato culinario creativo, prepara na e momento. Tambe lo tin programacion cu musica live, artesania y presentacion cultural pa duna un ambiente festivo.
Minister Geoffrey Wever a enfatisa:
"E festival aki no ta solamente un evento di cuminda, e ta un declaracion. E ta fortalece nos economia local, ta brinda un plataforma na nos piscadornan y empresarionan local, y ta un paso importante den direcion pa haci Savaneta e capital di pesca na Aruba.
E festival ta completamente den linea cu e Programa di Gobernacion di Gabinete AVP-Futuro, unda promocion di sector primario, apoyo na empresarionan chikito y stimulacion di economia local ta prioridadnan principal.
Di parti nos ministerio nos ta invita residente, bishitante y amantenan di seafood pa yega na e evento special aki. Bo presencia no ta solamente un garantia pa un dia inolvidabel cu cuminda, cultura y comunidad, pero bo apoyo ta yuda pa duna mas forsa na piscadornan y empresarionan local y ta fortalece identidad di Savaneta como pueblo di pesca.
Ban celebra hunto e diadomingo aki di nos seafood Arubiano, y yuda pa pone Savaneta Seafood Festival como un tradicion pa hopi aña mas!
