ORANJESTAD (AAN): Santuario di Burico na Aruba ta di fiesta den e dianan aki.
Exactamente 25 aña pasa e fundador di e Santuario di Burico, Ramon Boekhoudt, a busca refugio pa e prome burico cu yama Bambam. Ainda Bambam ta na bida, y ta bibando conhuntamente cu 130 otro burico den e Santuario.
E Santuario di Burico a bira un atraccion turistico riba nos isla, cu un total di ongeveer 30,000 bishitante pa aña. Pero mas cu esey e Santuario ta un lugar di refugio, cuido y siguridad pa nos buriconan. Mas cu 40 boluntario ta duna nan tempo, amor y cuido na e buriconan.
Pa celebra e fecha historico aki, e Santuario di Burico a organisa un Feria diadomingo, 24 di April di 10'or mainta pa 3'or atardi. Lo bai tin hopi actividad pa grandi y chikito, como tambe 30 booth cu diferente artesania y producto, musica pa entrene tur presente, weganan pa mucha y tambe dushi cuminda y bebida. Varios shelter y organisacion di bestia tambe lo ta presente. E organizadornan lo tene un subasta cu bunita mercancia.
