Directora Nathalie Maduro:
ORANJESTAD (AAN)—Den entrevista cu DIARIO, tocante posible cooperacion comercial cu Surinam, e Directora di LVV, Nathalie Maduro, a agrega cu e tin entendi cu tin un trip pendiente pa bishita Surinam y djey lo bay wak kico ta e posibilidadnan mas specifico, kico ta eigenlijk e proyectonan cu nan tin cu Aruba por traha cu nan.
Nathalie Maduro ta kere cu e ta un bon movecion, y loke si como Santa Rosa e lo boga p’e ta pa controla di ki material ta drenta.
E ta tene cuenta cu na Aruba nos tin un limitacion hopi grandi cu ta e leynan. E ley Fitosanitario cu, eigenlijk, Aruba no tin.
“Cu esaki mi kiermen cu ainda nos no ta controlando e malesa cu por drenta den e fruta of kizas mata, tampoco e tipo di insectonan cu kizas ta biniendo. Pues, e parti ey nos mester wak ki tipo di insectonan Surinam por tin, pa e no bira un problema pa Aruba, eventualmente. Nos conoce caba e situacion di African Snail, e saponan cu awendia bo ta haya tur caminda, anto e parti ey, mi ta kere si tene bon structura y cu tin un bon control, e lo ta un ayudo. Sinembargo, mi ta bisa si cu Santa Rosa ta boga pa produccion local”, Maduro a subraya.
Nathalie Maduro a bisa cu LVV kier wak mas produccion local. Awo por mira cu tin mas persona cu ta produciendo, bo ta wak esaki na e cantidad di farms & market cu tin. “Nos mes tabata tin un ‘pop up’ e siman cu a pasa y e ta ambos banda. Hopi hende nobo ta produciendo un tiki mas y tin tambe e demanda pa productonan local, cu ta creciendo. Di nos parti semper nos ta wak pa tin e balansa”, Nathalie Maduro, director di LVV a señala.
