ORANJESTAD (AAN): Despues di varios tempo Aruba por a experencia un awasero torencial diabierna ultimo.
Tabata algun dia caba cu awa tabata yobe sporadicamente y mantene nos suelo fresco. Pero e ultimo yobida a laga bastante awa atras cu damnan a colecta hopi awa. Mester menciona si cu no ta Aruba completo por a disfruta di un awasero torencial manera esun di diabierna ultimo. E yobida a tuma lugar na algun parti di Aruba. Mas den parti panoord manera entre otro Noord, Tanki Flip, Tanki Leendert, Paradera, Santa Cruz un parti.
Pariba di brug mes San Nicolas no a haya e mesun awacero torencial manera parti pabao di Aruba. Tin algun otro bario cu a haya dos biaha awasero di cual e ultimo atardi tabata esun mas fuerte cu a causa inundacion den algun bario. Aruba tabata tin mester di un un bon yobida pa por huma e suelo un poco y haci e atmosfera poco mas fresco y sigur haci nos agricultornan mas contento ainda.
Por bisa cu nos cunukero, productornan local ta mas cu contento paso Aruba ta hayando poco yobida aki aya den e dianan aki, sporadicamente cu no necesariamente mester haci uso di e awa e cranchi pa muha nan cosecha pero ta hayando poco awa di cielo. Esaki sigur ta yuda cu poco baha e gasto di recibo di awa fin di luna.
Mihor ainda si manera semper Departamento di Agricultura, Cria y Pesca Santa Rosa a duna varios biaha algun sugerencia con pa colecta awa di yobida na e momentonan aki kizas lo bo tin tanki of barinan cu a colecta awa. Ta simplemente e mester worde bon tapa pa no crea un otro tipo di criadero manera di sangura.
Despues di e torencial awasero Departamento di Agricultura, Cria y Pesca Santa Rosa a sali y haci un control riba e damnan den e barionan manera menciona cu mas awa a yobe. A controla dam di Noord cu ta esun pariba di Misa di Noord cu a colecta hopi awa y no ta falta mucho cu e ta full. A sigui pa e Dam di Tanki Flip cu tambe a colecta hopi awa. Pero tin lugar ainda pa mas. Esun di Tanki Leendert tambe ta casi yen. Dam di Rooi Afo ta hopi yen y no falta mucho pa eta full. Damnan manera esun di Pavia, Rooi Bosal, Kas Ariba, Dam di Trappers, band’i Trappers Club, net na banda Dam di Sabina y Pal’i Boonchi cu ta keda panoord di Weng Kee Supermarket na Piedraplat falta hopi ainda pa yena. Kiermen tin lugar pa mas awacero. Por spera mas yobida den e ultimo lunanan cu ta keda aki cu kizas por caba di yena e damnan cu mas awa. Ban spera cu esey por ta e caso.
Departamento di Agricultura, Cria y Pesca Santa Rosa tin e tarea pa sigui cumpli cu nos productornan local cu ta keda haci e peticion pa entrega di awa di dam. Casi tur dam tabata seco cu a cuminsa dificulta entrega di awa pa nos productornan. Awor tin awa di dam pa un period poco mas largo pa asina suavisa e peticionan.
Pa esnan cu nan mes ta bay recoge awa cu nan pick-up y tankinan blanco di 1000 liter esaki semper ta aceptabel pero corda haci bon uso di dje pa asina bo produccion por ta un exitoso. No lubida cu eta pa Agricultura y Cria solamente no pa nada otro.
