Otmar Oduber di PPA
• Pa nos refineria na San Nicolas ta obsoleto
ORANJESTAD (AAN): “Nos ta bisa awe delanta na comunidad di Aruba cu pa nos refineria ta obsoleto, nos mester cambia di direccion, bo tin hopi caminda cu por cana prome cu e pier aki bay den un estado cu ya caba ta bezig ta brokkel af, segun mi por a compronde for di expertonan”. Esaki ta palabranan di otmar Oduber papiando riba desaroyo di San Nicolas.
E ta lamenta cu e estado di e pier ta deteriorando, siendo cu e ta un di e mihornan den nos region pa trece diferente tipo di carga y turismo crucero. Na aña 2018, Otmar Oduber como ex minister di infrastructura a firma un acuerdo cu e director di RDA pa e terenonan aki rond di e waf bin back pa Pais Aruba y asina inicia e proceso pa crea e “San Nicolas Ports Authority”, por cierto un vision di e ex minister Romero cu nunca a haya su rais.
“E prome stap tabata pa haya e terenonan back y pa despues cambia e “bestemming” di e tereno aki pa por ehecuta entre otro e vision aki di un waf di carga y turismo pariba”, Otmar Oduber a duna di conoce.
San Nicolas mester haya un desaroyo na su waf caminda no solamente ta bin un competencia husto pa reduci prijs di esnan cu ta importa producto na Aruba, pero tambe pa ti barconan crucero y otro barconan cu por worde mara pariba pasobra a crea un desaroyo suficientemente grandi.
Riba e tereno di e refineria tin hopi espacio pa continua den energia alternativo, percura pa tin molinanan di biento, veldnan di panelnan solar y ademas tin un rapport cu a worde traha tempo Otmar tabata minister di Transporte, hunto cu Sr. Carlyle de Couteau q.e.p.d. director di Scheepvaart y Sr. Ben Marapin, den cual tin mas cu 30 proposicion di diferente industrianan nobo cu por worde crea riba e tereno aki.
Oduber a menciona e parti di e Civic Spine tambe. El a bisa cu a haya e terenonan back pa loke ta trata e plannan cu tabatin den pasado pa e Civic Spine caminda cu por cuminsa cu e prome parti pa adresa e infrastructura y trece turista y carga pasobra tin hopi tereno cu ta contamina, cu cualnan por haci otro trabaonan cu nan.
Lamentablemente ta cu ni gobierno di AVP ni di MEP tabatin un unanimidad pa dicidi kico lo bay haci cu e tereno ey. E dos gobiernonan aki a priminti un cantidad di cos pa e tereno aki cu lo mester ta un alternativa pa e refineria of no, pero finalmente te awe, ningun a worde cumpli cune.
“Nos ta kere cu e prome paso ta pa percura di haci uso di e pier pariba na San Nicolas y percura pa nos por trece carga back y trece crucero, ademas di rebiba e idea di bin cu un ferry pa comunica e islanan”, Otmar a declara.
