Azeta di Texas (WTI Crude) tabata acerca 70 Dollar pa Baril
*Merca na cabez, Rusia y Saudi Arabia top productornan azeta
*Clima ta afecta Canal di Panama y Guera peliger na Canal di Suez
ORANJESTAD(AAN)—Aunke Aruba a drenta e temporada di Carnaval, e no por perde atencion pa un situacion mundial sumamente delicado, cu lo domina politica mundial y asina economia mundial na 2024.
DIARIO cu luho di detaye a prepara Aruba pa e mundo cu ta spera despues cu a wordo dicidi na 2021, cu industria petrolero lo mester yega na su fin.
Na un forma continuo Gobierno di Aruba a tuma medidanan y a ahusta su maneho economico den e cuadro di cambio di clima y final di petroleo.
Pa Aruba tin bon bista riba e situacion mundial actual, na prome lugar mester tene cuenta cu dos situacion cu na forma imediato ta afecta normalidad mundial.
Coneccion maritimo historicamente ta di sumo importancia.
Esaki tabata directamente e motibo pa cual a construi e Canal di Panama pa conecta Oceano Atlantico (Region di Caribe) directamente cu Oceano Pacifico cu a bira un ruta alternativo pa comercio mundial.
Awe e ruta aki, manera DIARIO a presenta cu tur detaye na 2023, ta na peliger debi na e cambio di clima, cu ta baha e nivel di awa den Canal di Panama.
Otro ruta di sumo interes mundial, ta e Canal di Suez, sigur den cuadro di e papel cu e industria petrolero ta hunga na mundo.
Manera DIARIO a splica durante e ultimo simannan, Aruba mester tene consideracion cu aumentonan di prijs di transportacion cu lo afecta henter mundo pa motibo di e guera na Gaza.
Un crisis na e Canal di Suez na e momentonan aki, segun expertonan mundial sigur lo bira un amenaza pa henter economia mundial, sigur Aruba, pa motibo cu prijsnan mundialmente lo wordo afecta den e resultadonan economico serio cu mundo conoce for di e Pandemia di 2020, e Guera di Ukraine, inflacion na 2022 sigui pa un 2023 cu no por a crea e solidez mundial cu a wordo spera.
Mundo ta na un guera cu su mes cu un economia cu cada bez ta bira mas delicado,segun entre otro Banco Mundial.
Na e momentonan aki, manera expertonan ta splica, petroleo mas y mas a bira un arma politico cu mundo no por a mira.
Na momento cu e Guera na Ukraine a haya su inicio, DIARIO a base di peticionnan mas informacion continuo, a splica cu ora papia di petroleo, ta papia di un poder economico den man di e dos paisnan mundialmente poderoso cu Merca y Rusia na prome y segundo lugar.
DIARIO na momento cu e Guera di Ukraine a rementa, a pone enfasis riba e relacion directo entre e poder petrolero di Rusia y Merca y reservanan di petroleo y otro rikeza den suela di Ukraine.
Durante ultimo añanan sigur e sistemanan manera Inteligencia Artificial, a haci posibel pa periodismo cumpli mihor cu su trabou y entrega Aruba tambe cifranan cu ta haci e situacion mundial mas comprendibel.
Ora bisa cu industris petrolero mester yega na su final, ta papia di e industria Mericano di petroleo cu na September di 2023, a kibra record cu produccion di casi 13 Miyon bari di azeta pa dia y a keda productor number uno di azeta na mundo.
Un lugar cu pa hopi tempo tabata conoce competencia directo di Rusia, cu a baha pa segun lugar pa yega casi 9.5 Miyon baril y Saudi Arabia (representando OPEC) cu alrededor di 9 Miyon baril.
Prijs di petroleo a wordo afecta debi na decisionnan cu Gobierno Mericano a tuma y asina a afecta e prijsnan cu Saudi Arabia y Rusia tin pa nan produccionnan.
Esaki ta e motibo cu DIARIO na diferente momento a adverti su lectornan cu mester presta bon atencion na e fluctuacion di prijs di petroleo y e forma cu prijsnan na Aruba ta baha influencia pa politica mundial.
Si pone e realidad aki hunto cu e hecho cu e actual problemanan na Medio Oriente a baha e trafico maritimo den e zona aki cu casi 90 porciento, por mira un situacion mundial, cu ta exigi cautela cerca publico di Aruba, sigur si tene consideracion cu medidanan di clima cu tambe ta exigi (manera DIARIO a splica ayera) cambionan importante pa tanto mundo comercial como e cumprador, consumidor na Aruba.
Manera DIARIO a adverti tambe, na paisnan grandi manera Merca, ya economia a cuminsa basa su mes riba traspaso pa energia alternativa cu ta costa placa como inversion.
Ayera e situacion na Medio Oriente a empeora mientras na Merca, alarma grandi ta wordo bati pa resurgimento di Covid-19.
Prijs di azeta tabata completamente desregula cu WTI Crude di Merca acercando 70 Dollar pa baril na ciere di e edicion di DIARIO di awe.
