Premier Wever-Croes: - "Nos no lo apunta ningun candidato cu por tin problema cu husticia"
ORANJESTAD (AAN): Riba e pregunta di un miembro di prensa cu ta cuestiona e nombramento di Rocco Tjon como minister di husticia, Prome Minister Evelyn Wever-Croes a contesta bisando cu "nos no a pone ningun minister encarga cu tin cualkier sospecho di algo. Sr. Rocco Tjon a pasa su screening. Su screening a pasa bon y por cierto señor Tjon ta di dos biaha cu e ta pasa screening, paso biaha pasa si mi a manda candidato reserva (...), pero pa mi tabata un candidato reserva".
E biaha aki, Rocco Tjon a bolbe pasa su screening y no tin ningun duda den esey y sigur no lo apunta ningun candidato cu por tin un of otro problema cu husticia ya cu ademas esey simplemente no por, Wever-Croes a remarca.
El a agrega cu tin un decreto gubernamental (landsbesluit) pa loke ta screening y a base di esey mester actua tambe.
FUNCION DI VANESSA TJON-KOCK
Pa loke ta e funcion temporario di Vanessa Tjon-Kock, ken lo no eherce su funcion di Alto Comisario di Polis durante 4 aña, e mandatario a bisa cu asina cu e asunto aki keda cla lo anuncia detayenan di e funcion nobo.
