ORANJESTAD (AAN): Mescos cu cualkier pais na mundo gobierno y Eilandsraad di Aruba a tuma e decision cu 18 di maart ta nos Dia Nacional, esta nos Dia di Himno y Bandera.
Sinembargo, promer cu por a yega na e celebracion historico aki, un lucha tenaz a tuma lugar pa finalmente logra concretisa nos simbolonan di union y libertad.
Aprobacion di Himno y Bandera
Dia 21 di januari 1976 Bestuurscollege di Aruba a instala un comision di 6 ciudadano prominente di nos comunidad y e comison aki tabata consisti di Maybelline Arends-Croes, Rufo Odor, Padu Lampe, Eddy Bennett, Hubert Booi, Rufo Wever y como secretario J. Wever. E tarea di e comision aki tabata pa conseha Bestuurscollege riba e pregunta si mester haci ‘Aruba Dushi Tera’ himno nacional di Aruba y si esaki ta afirmativo, ki sorto di ritmo – sea marcha of wals – tin cu wordo uza.
E comision den forma unanime a vota na fabor di interpretacion di e himno den e ritmo di wals. E comision a duna su recomendacionnan na Bestuurscollege dia 25 di februari 1976 y dia 16 di maart, esta un dia manera awe 46 aña pasa Eilandsraad di Aruba - cu 14 voto na fabor y 5 voto contra - a aproba ‘Aruba Dushi Tera’ como himno nacional di Aruba. Riba e mesun dia aki e decreto di e bandera oficial di Aruba tambe a ser acepta cu 13 voto na fabor y 6 contra.
Tabata lamentable si cu e aceptacion di nos himno y bandera no a bay sin su obstaculonan, ya cu den Eilandsraad tanto AVP como PPA a vota contra nos himno y bandera. Alavez cierto funcionarionan a trata na obstaculiza introduccion di nos himno y bandera.
Te hasta a yega asina leu cu nos Libertador Betico Croes mester a hipoteca su cas pa por a cumpra e banderanan pa cu su introduccion oficial dia 18 di maart 1976.
Pakico un himno y bandera ?
Pero e pregunta principal ta, pakico Aruba tabatin mester di un himno y bandera? For di inicio di su carera politico nos Libertador Betico Croes a constata cu durante decadanan largo tabata existi un division y segregacion den e pueblo Arubano y cu esaki a stroba nos den nos desaroyo economico y tambe politico estatal.
E segregacion aki tabata un di e motibonan principal cu a impedi Aruba sali for di e constelacion Antiyano.
Vision di un gran lider
Como un politico visionario Betico Croes su meta tabata primeramente pa trece union den e pueblo aki. Den un pais, unda ta reina un deseo ferviente pa sali for di e constelacion Antiyano pa bira un pais autonomo, bo mester promove e simbolonan di union y libertad, unda cu cantando bo himno bo ta expresa bo amor pa bo pais y hisando bo bandera bo ta inculca nacionalismo bao di bo pueblo.
Awe 16 di maart 2022 ta un dia historico y di reflexion pa un y tur den e comunidad, ya cu introduccion di nos himno y bandera tabata instrumental den e logro di Status Aparte. Sin e himno y bandera nos ciudadanonan lo no tabata tin nada pa gara na dje y consecuentemente lo no tabata tin nada pa trece e union tan necesario den e pueblo Arubano.
Partido MEP ta gradici nos Libertador Betico Croes pa su vision y determinacion y tambe na su lider honorario Nelson Oduber cu tabata e diputado encarga cu e realizacion di nos bandera y nos himno nacional "Aruba Dushi Tera". Den e dianan nos dilanti, ban nos tur hunto duna realse, honor y respet na nos simbolonan di union y libertad.
{gallery}Riba 16 di maart, 46 anja pasa Eilandsraad di Aruba a aproba introduccion di nos himno y bandera{/gallery}
