Democracia ta basa ariba tolerancia y buskeda di solucion
*Un Gobierno di minoria a presenta maneho di Reino 2026
ORANJESTAD (AAN) — Diamars Reino Hulandes a conoce un evento cu ta entrega na mundo e prueba, cu e structura di Reino Hulandes ta basa ariba e Orden di Ley cu ta honra e realidad di democracia.
Prinsjesdag ta marca e presentacion di Rey Willem Alexander ariba e maneho cu Gobierno lo hiba na Staten Generaal, cu ta wordo forma dor di Eerste Kamer y Tweede Kamer Hulandes.
E ta wordo considera como apertura di aña nobo di Parlamento y Senado cu ta haya informacion di trabou y plannan di Gobierno pa e siguiente aña.
Gobierno di Reino ta entrega na representantenan eligi pa Pueblo, e maleta cu documentacion di e forma cu placa di Pueblo Hulandes lo wordo gasta den Reino, den cual Aruba y Arubianonan na tur parti di mundo, ta inclui y tambe na Hulanda segun e cifranan pa maneho di Hulanda como pais.
E reunion di ayera, tabata tin un caracter special ya cu un Gobierno demisionario, na caminda pa eleccion na October, ta entrega plan pa 2026 ora un Gobierno nobo lo ta na mando.
Rey Willem Alexander a presenta un discurso historico, den cual el a recorda cu e alma di existencia di politico ta basa ariba servicio na Pueblo, pues e bienestar di Pueblo.
Rey Willem Alexander den su discurso ayera a hiba Reino atrobe na e realidad di Orden di Ley di democracia, cu ta exigi tolerancia y e boluntad pa coopera.
Den e discurso di Rey a bini dilanti puntonan cu semper DIARIO a presenta como exigencia di democracia na politiconan, cu mester traha na bienestar di e pais cu e placa di Pueblo cu nan ta ricibi hunto cu tur e beneficionan gubernamental.
Rey Willem Alexander den su discurso di ayera, a atende directamente cu e situacion actual di Reino, cu manera DIARIO basta dia pasa a expone, conoce un Gobierno di minoria den Parlamento.
Rey Willem Alexander a trece dilanti con debate y puntonan diferente di opinion, ta hustamente e base di e sistema democratico.
Un democracia bibo ta rekeri pa na forma adulto tene man di otro pa asina por traha pa e pais.
Hende mester por traha cu otro y acepta e posicion di otro pa asina duna contenido na e realdad di Democracia cu no ta basa ariba confrontacion di hende pero ariba e union cu mester alcansa pa asina hunto traha pa Pueblo.
Rey Willem Alexander a entrega Reino ayera e berdad di sistema politico democratico cu mester garantisa e bon funcionamento di e Reino Constitucional .
Na un evento culminante pa Reino, Rey Willem Alexander a reforza e berdad democratico cu mester goberna paisnan cu ta aboga democracia, den cual tin respet pa opinion di otro y e bienestar nacional ta prevalece den un mundo, cu ariba tanto tereno ta wordo confronta cu falta di tolerancia, cu democracia ta exigi!
