Grupo di riesgo a bira mas grandi pero tambe mas hoben ---- *Omicron a kibra teoria di imunidad natural cerca pashent --- *Riesgo grandi ta wordo tuma cu variante cu ainda ta un misterio
ORANJESTAD(AAN)—Omicron por resulta un peliger sumamente grandi pa comunidad mundial.
Expertonan falso ta deshaci di e estado di alerta grandi cu mundo mester mantene enfrente e variante Omicron.
DIARIO den combersacion cu informantenan clave, a wordo mustra riba e hecho cu expertonan di mas grandi cu a bini dilanti for di momento cu Covid-19 a presenta na horizonte, ta sumamente cuidadoso cu informacion cu nan ta duna na publico.
“Omicron segun observacionnan ta menos peligroso pa pulmon cu variantenan anterior di Covid-19,” informantenan ta trece dilanti.
Nan ta papia aki di “segun observacion” pasobra ainda mundo medico internacional ta en busca di contestanan importante relaciona cu Covid-19 y di e variante Omicron.
“No por bisa cu ta trata aki di un variante sin resultado peligroso,” informantenan clave ta trece dilanti. Nan ta indica cu ora ta trata expresionnan cientifico no por atende cu suposicion, pero cu informacionnan cu te ainda ta wordo busca pa haya bista real riba e malesa y sigur e variante Omicron.
Na prome lugar nan a trece dilanti cu tin diferente factor cu ta dicidi riba resultadonan di un malesa.
E prome variantenan di Covid-19 a ataca pulmon di hende den mayoria di caso. Un pulmon afecta tin consecuencia grave riba termino hopi cortico.
Omicron ta afecta garganta cu por tin resultado tambe riba henter curpa.
Na e momentonan aki ta sumamente riesgoso pa baha e estado di alerta pa e variante Omicron pa diferente motibo.
Na prome lugar, por a nota e prome variantenan di Covid-19 a ataca principalmente e comunidad mas fragil na mundo cu tabata personanan di mas edad (cu mas chens di tin otro enfermedad) y personanan cu sobrepeso, historial medico importante, pues personanan di riesgo mas halto.
Delta a cuminsa ataca personanan di edad mas abou pero Omicron ta ataca hende di tur edad.
E hecho cu e prome variantenan tabata ataca personanan cu mas riesgo di nan salud, sigur a yuda pa un cifra mas halto di mortalidad y casonan severo di un mundo, cu no tabata tin un vacuna ni remedi.
Den caso di Omicron, por nota un cantidad halto di hende hoben cu bon condicion di salud, cu ta wordo afecta pero na un forma leve.
“Mayoria di e hobennan cu ta wordo afecta no tin un historial medico importante manera ta e caso cu hendenan di edad mas avansa,” a wordo trece dilanti.
E grupo di edad avansa, cu ta e grupo mas na riesgo pa cualkier enfermedad, ta tuma mas prevencion contra Covid-19 cu e grupo di hobennan.
Algo cu segun informantenan ta sumamente importante ta tene na consideracion ta e hecho cu no ta solamente hende cu a busca inmunidad pa medio di vacuna ta wordo afecta pa Omicron.
E teoria inicial tabata cu personanan cu a haya Covid-19 den tempo di e variantenan anterior, no ta haya e malesa atrobe.
Cifranan ta mustra cu personanan cu a haya Covid-19 prome cu Omicron a haci su entrada, awor a haya Omicron loke ta nifica cu imunidad natural ta wordo kibra dor di Omicron, cu ainda pa un parti grandi ta un misterio pa cientificonan.
“Covid-19 ta un enfermedad nobo den un mundo, cu hopi comunicacion mundial cu ta yuda e malesa plama,” a wordo trece dilanti.
Informantenan ta indica cu mester keda den estado di alerta pasobra no ta conoci kico Covid-19 lo haci ainda riba termino mas largo.
“Ta trata di un malesa pisa cu a afecta hende. Di infeccion di un virus. Kico el a ocasiona den curpa humano riba largo plazo no ta conoci,” a wordo splica.
Hecho ta cu mester ta mas cauteloso cu Omicron cu a kibra e imunidad natural cu resultado importante.
“Na Hulanda hendenan tabata pidi otro pa contagia nan cu Covid-19 tempo di Delta pa nan haya imunidad natural. Awor nan a wordo infecta cu Omicron, cu ta yena hospitalnan y ta paralisa cuido medico rond mundo,” informantenan a bisa.
Un advertencia ta bay pa tur hende pa no baha e prevencion contra e malesa cu ta sigui destrui bida humano y pa cual ningun cientifico ainda kier duna declaracion definitivo.
