Parlamentario Shailiny Tromp-Lee:
ORANJESTAD (AAN): Minister Glenbert Croes y Enseñansa Pa Empleo (EPE) a bin ta traha duro pa mehora e efectividad di e cursonan cu nan ta brinda na esnan cu ta buscando un trabou of ta desea di haci un cambio di trabou.
Pa logra esaki ta trahando structuralmente na mehoracion di e relacion cu stakeholders, priomordialmente e doñonan di trabou cu tin necesidad grandi na trahador. Por bisa cu awo mas cu antes tin stakeholders cu ta duna support, feedback y ta apoya EPE cu ehecucion di su maneho y cursonan.
Manera indica pa EPE semper AHATA tabata y ta un di e stakeholder mas grandi pa loke ta trata e cursonan di hospitality. Banda di AHATA, EPE tin bon relacion cu diferente hotel manera Marriott, Divi, Ritz Carlton/ St. Regis, Hilton, Holiday Inn, Iberostar y Secrets. E stakeholdernan aki ta clave pa loke ta trata reconocimento di e cursonan di hospitality y idiomanan. E cursonan di EPE ta wordo reconoci door di nos mercado laboral, door di e calidad di esakinan pero tambe door cu semper ta buscando manera pa adapta cursonan excistente pa e necesidad na mercado laboral, of hunto cu un stakeholder specific ta diseña un curso nobo cu ta conforme nan deseo y necesidad.
Un bon ehempel ta e cooperacion indica pa EPE cu nan tin cu Swift Distribution. Den conversacionnan di EPE cu Swift Distribution cu ta carga entre otro e marca L’Oreal, a mira e necesidad pa tin mas regulacion den e ramo di pelukeria. Entre otro e reto pa salonnan haya trahador local y of pa nan obtene un permiso di trabou pa un trahador ta dificil. Banda di esaki tin basta persona cu ta ofrece servicio di pelukeria for di cas, pero hopi biaha nan falta educacion of formacion di e sector aki of di negoshi y ta den necesidad di curso pa por sigui desaroya.
Tur e puntonan aki a duna EPE suficiente motibo pa cuminsa cu un curso yama: “Introduccion na Pelukeria”. Siman pasa diahuebs 22 di augustus a anuncia cu e curso aki lo cuminsa 10 di september 2024 y ya pa dialuna 26 di augustus tur e 20 cuponan a wordo yena caba, y tin por lo menos 17 persona riba wachtlijst. Esaki sigur ta indica e necesidad y interes cu tin pa e tipo di curso aki.
Otro ehempel ta cu mirando e desaroya den e ramo energetico/tecnico, den cooperacion cu EPB San Nicolas, EPE a logra haya infrastructura adecua pa cuminsa curso di Handyman nivel 1, Welderdo A y Electricien basico. Companianan Estatal (WEB, Elmar, RdA y Utilities) a mira e importancia pa e cursonan aki y a sponsor e materialnan necesario. Minister Glenbert Croes a anuncia awe cu e cursonan aki ta bay cuminsa dia 10 di september 2024 y lo tuma lugar na San Nicolas.
Como parti di ehecucion di nan maneho EPE ta invita diferente stakeholder durante nan examennan pa asina nan mes por wak y experencia e habilidad y conocemento di e cursistanan. E approach aki ta trahando sumamente bon y ta habri posibilidadnan concreto pa e cursistanan.
Durante examen di hospitality por ehempel nan ta pidi entre otro HR directors pa ta presente y por bisa pa e cursonan di hospitality di EPE tin casi un 100% rate di success. Cursistanan di por ehempel Casino Dealer ta obtene trabou mesora, y e cursistanan di waiter y bartender cu a logra e parti teoretico y cu pasa nan stage cu exito tambe por conta riba un empleo den nan ramo.
Tur esaki ta muestra cu trahando hunto, dirigi riba e necesidad y desea nan di e doñonan di trabou ta logra habri portanan pa trabou pa nos hendenan local. Asina por cumpli mihor cu e demandanan di nos mercado laboral.
