Caroline Hart, directora di Respaldo
ORANJESTAD (AAN): Directora di Respaldo, señora Caroline Hart a duna un entrevista na DIARIO, na unda el a splica cu nan ta trahando riba diferente aspecto pa asina nan por ta mas enfoca riba cuido di nan cliente, pa asina e tratamentonan por ta mas efectivo y duradero.
Como organisacion profesional, nan ta bay diferente training, percura pa un miho automatisacion y internamente busca un miho operacion pa brinda un miho servicio. Respaldo a caba di introduci un software cu ta yama, EVS (elektronische voorschrijfsysteem) cu ta yuda e psikiatranan prescribi remedinan y e enfermeronan riba afdeling. Na momento cu un psikiatra ta prescribi un remedi na e pashent, esaki ta gelink na e botica, cu por wak si e pashent ta tumando remedinan somatico, cu por causa efecto riba e remedinan psikiatrico. Esaki ta alerta e specialista pa tene cuenta cu e remedi y e por haci cambionan necesario. E innovacion aki ta yuda evita foutnan den remedinan, cu por tin consecuencianan grave pa e pashent.
Respaldo ta hopi mas enfoca riba e cuido di e pashent y su ambiente y esnan mas cerca di dje. Cu introduccion di ROM (routine outcome monitoring), nan por keda evalua e pashent mes y lag'e yena un lista di pregunta, manera si e tratamento cu e ta ricibiendo ta yudando, of si mester haci algun cambio. E 'feedback' di e pashent ta hopi importante pa asina nan por ked ahusta e tratamento pa e miho resultado posibel.
Hart a indica cu nan ta conciente cu e lista di espera ainda ta hopi largo y e ta hopi contento di por anuncia cu e luna aki nan a cuminsa yena algun vacatura cu nan tabatin habri, pa haya mas profesional. E motibo cu e lista di espera ta asina largo ta pasobra no tin GZ psycholoog disponibel pa sigui cu e tratamento.
Desde 1 di September, nan tin un klinisch psycholoog y aki pronto un GZ psycholoog nobo y waarnemend jeugd en kinderpsychiater pa reforsa nan jeugd en kind poli. Nan ta bezig ta yenando e vacaturanan, pa asina poco poco pero sigur e lista di espera por bira mas cortico.
