Caroline Hart, directora di Respaldo
ORANJESTAD (AAN): Den un entrevista cu DIARIO, señora Caroline Hart, directora di Respaldo a splica cu e logo nobo di Respaldo ta parti di nan aspiracion 2030, cu ta full un proyecto cu a cuminsa na aña pasa, pa 'revamp' Respaldo totalmente, tanto como organisacion y manera di traha, dus esaki tambe a inclui un logo nobo y un website nobo.
Hart a conta cu manera por wak, e logo nobo ta un man cu ta tene e cerebro, basicamente e palabra Respaldo ta nifica cu nan ta respalda salud mental, cu ta nan 'core business' y e punto cu ta conecta otro ta pa subraya importancia di cooperacion, no solamente Respaldo, como tambe di tur otro organisacionnan cu ta traha cu nan.
Respaldo kier pa comunidad ta conciente cu nan ta profila nan mes como specialista riba tereno di salud mental, nan tambe ta atende cu casonan sikiatrico, specialisa y compleho. El a duna como ehempel, nan socio Stichting Hunto ta trata casonan basico di salud mental, y nan ta atende casonan specialisa y mas compleho y avansa. Respaldo tey pa comunidad di Aruba, y nan ta habri pa sirbi nan di un manera hopi profesional y nan mes ta sigui profesionalisa nan mes pa asina por brinda e miho servicio posibel na comunidad.
Hart a indica cu manera un persona ta sinti cu algo no ta bon cu nan salud mental, ta importante pa acudi na dokter di cas, pa asina e por evalua e situacion y tuma e decision si ta necesario pa verwijs e pashent na cierto instancia.
Respaldo kier trece mas concientisacion den comunidad riba salud mental, cu ta un area di salud manera tur otro y no mester tin un stigma su tras. Ta hopi importante pa normalisa salud mental y hende no mester sinti berguensa of miedo pa busca ayudo.
