ORANJESTAD (AAN): Den e ultimo lunanan di 2021, na casi tur resortnan grandi den Caribe a bin ta detecta con gradonan di ocupacion ta subiendo asina bon,
te cu dado momento algun a hasta logra yega bek na 100% di ocupacion. Esey ta loke Hotelnan na e.o. Republica Dominicana, Puerto Rico, Jamaica, Bahamas, St. Maarten, y Barbados ta raportando.
Pero awor cu e variante di Omicron ta plamando rapidamente y ta contagiando mas hende cu nunca antes cu Coronavirus, tur cos a cuminza cambia.
Turistanan a cuminza ta cancela nan viahe programa e simannan venidero, y tambe pa Februari y hasta na Maart cu ta bin. Esaki ta pa e temor di contagia nan mes cu Coronavirus, pero tambe debi na e hecho cu e isla y paisnan den Caribe ta exigi pa nan yega cu un PCR-Test negativo di menos cu 72 of 48 ora prome, ta birando un dolor di cabez.
Aworaki na Merca mes, kizas ta dura 3 dia prome cu bo por haya resultado di bo PCR-Test. Pasobra e demanda di test na varios estado na Merca a crece explosivamente y bo tin di para tin biaha hasta 3 ora den rij prome cu bo por haci test.
Algun ehecutivo di Resortnan grandi ta mira cu esaki ta e bottleneck principal aworaki, pasobra e turista no tin seguridad cu e lo por haya resultado dentro di 72 ora prome cu e por upload e informacion riba e plataforma digital di e paisnan, pa asina porfin e por subi avion pa start su viahe pa Caribe. E pensamento ta cu esaki lo por causa un caida catastrofico den e industria turistico awor na Januari y Februari.
Y pesey mes cancelacionnan a cuminza drenta na gran cantidad. Pa colmo tin Aerolineanan tambe cu a cuminza cancela cierto vuelo pa Caribe. Tin algun turista disgusta tambe cu algun isla a cambia nan rekesito pa entrada na nan pais, y e ta trece yen di confusion.
Tin di corda cu tin hopi otro pais cu ta compitiendo cu Caribe pa haya turistanan. Por ehemplo na Mexico, nan no ta exigi ningun prueba negativo di Covid-Test pa bo drenta. Y tin algun isla cu ta bayendo den e direccion ey tambe, pa evita cu nan ta perde e cantidad di turista cu lo a opta pa viaha pa Mexico.
