Prome Minister Schoof:
*El a keda impresiona cu hospital y trabaonan pa mantene Aruba un lugar atractivo
ORANJESTAD (AAN): Prome Minister di Hulanda Dick Schoof tabata na Aruba recientemente y el a tuma e oportunidad pa bishita Horacio Oduber Hospital Diadomingo riba Dia di Mama.
Durante un conferencia di prensa e Prome mandatario Hulandes a bisa cu e dia prome el a reuni cu Gobernador y tambe cu e parlamentarionan di Aruba, mientras cu e dia despues el a cuminza ta jog banda di Eagle Beach, cu e ta haya cu ta un di e beachnan mas bunita di mundo.
Pa loke ta su bishita na hospital, el a bisa cu ta bunita pa wak con e hospital di Aruba a wordo modernisa y amplia, pa eleva e nivel di cuido medico na Aruba na ainda mas cu e tabata.
Schoof a bisa tambe cu e ta haya hopi bon cu Aruba ta inverti den material tambe, specialmente mirando tambe cantidad di desastre di naturalesa cu ta tuma lugar rond mundo, e posibel crisisnan di salud y pa cualkier accidente of incidente grandi.
Prome Minister Hulandes a bishita KIA tambe Dialuna y a bisa cu e ta wak bek riba un hopi bon bishita na nos isla, unda cu el a wordo ricibi na un manera caluroso.
“Mi a tene combersacionnan cu diferente hende, incluyendo esnan cu ta traha duro pa sigui mantene y haci Aruba mas atractivo pa e habitantenan, como tambe e turistanan”, segun Schoof.
Prensa a puntra e Prome Mandatario tocante e plan cu Gobierno nobo di Aruba tin pa cambia pidi Hulanda pa cambia e prestamo di nos isla den un fondo di inversion y Schoof a bisa cu mirando cu e palabracionnan haci ta pa Aruba paga bek e debe na Hulanda, no ta mucho probable cu esaki lo wordo cambia den un ‘donacion’ na Aruba.
Pa loke ta e relacion di Hulanda cu Aruba, el a bisa cu e relacion di Hulanda cu e gabinete anterior di Aruba mescos cu e gabinete actual ta un bon relacion.
“Esaki no ta nifica cu semper nos lo ta di acuerdo cu otro, pero tur dos banda semper lo kier yega na solucionnan cu otro”, segun Schoof.
