Tanto na nivel mundial como local generacion nobo ta haci su entrada
- Mike y e posibilidad cu yiu di Benny lo hereda puesto di su tata riba lista
- E candal na frontera cu Venezuela y cambio di clima y politica mundial
ORANJESTAD (AAN): Na 2024 Aruba ta bandona salida di temporada di vacacion grandi, na e momento cu henter mundo ta parce di ta riba su cabez pa motibonan fabrica pa hende na nivel internacional pero tambe pa motibo cu naturaleza mes ta protesta contra comportacion di hende.
Na Hulanda, calor a bira asina intenso, cu hende mester biba bentana habri si no tin placa pa tene bentana cera pero no pa evita cu friu ta drenta pero pa hustamente evita cu e bentana habri ta pone e friu di airconditioning sali y e calor inmenso drenta.
En corto por bisa cu e situacionnan local y internacional, lo no permiti Aruba bolbe na loke semper tabata considera como normalidad, teniendo cuenta pues cu e calor inmenso, cu ta haci areglonan special pa trabou, school, transporte y sobrevivencia di un parti grandi di comunidad, mester wordo tuma.
Mester tene na consideracion cu e calor ta mishi cu e parti financieramente mas debil den comunidad. Den e grupo aki ta topa cu entre otro hende grandi, personanan cu condicionnan medico cu no por cu calor, pero tambe trahadornan cu no tin placa pa gasta na un auto propio y mester haci uzo di transportacion publico.
Na segundo lugar no mester lubida, problemanan importante cu mundo ta crea pa Aruba.
E situacion di guera na Medio Oriente ta empeora y mester tene e posibilidad di un crisis serio na e region na mente cu tur resultado cu esaki lo tin pa mundo riba nivel economico pero tambe riba nivel politico internacional.
Kico un expansion di e guera na Medio Oriente lo nifica pa mundo? Un pregunta cu sigur Aruba mester tene na mente, ya cu e ta parti di e macuto di problema cu tin actualmente na Merca, e productor mas importante di exito economico di Aruba pero tambe si situacion cambia, problema pa Aruba.
Kico eleccion na Merca lo nifica pa Aruba durante e proximo lunanan aki y te na November ora eleccion dicidi kico futuro di Merca lo ta?
Ta trata di uno di e eleccionnan cu mayor emocion cu Merca a conoce den hopi tempo pero sigur ta peligroso pa hasta paz mundial, si tene na cuenta e papel importante di Merca riba tereno di politica y economia internacional.
Di kico ta wordo papia sigur ta haya mas contenido si no lubida cu Mexico, a invita Presidente Ruso Putin pa asisti na inauguracion di su proximo Presidente izquierdista, cu ta un sosten pa Nicolas Maduro, cu ta nenga di acepta su derota durante eleccionnan na Venezuela, cu desaroyo cada dia mas peligroso pa Venezuela.
Na Aruba ainda frontera ta cera y e pregunta si frontera lo habri mester wordo contesta na un momento, cu inseguridad nacional ta uno di e problemanan mas serio di Venezuela cu por conoce un bataya serio pa poder, pa no papia mes di situacionnan mas pisa.
Problemanan serio na Aruba mes no por wordo bari for di mapa. School ta bolbe habri porta na luna di Augustus cu lo conoce un aumento di actividad di horcan, cu pues lo ta mas cu otro añanan, pero te ainda no a conoce mucho desaroyo.
Con e sistemanan tropical lo move riba un oceano na candela? Realidad ta, cu Aruba mester ta prepara mas cu nunca.
Pero tin otro turbulencianan di caracter diferente na caminda pa Aruba tambe.
Fin di vacacion y regreso na bida normal lo nifica tambe cu dia 21 di Augustus den sala di Corte lo discuti e caso pa kita 1 Miyon Florin di Benny Sevinger, cu ainda ta Miembro di Parlamento di AVP aunke Corte di Husticia a aumenta su castigo.
Fuentenan di DIARIO ta pendiente si Benny ta dicidi di sigui cu su caso den Corte Supremo na Den Haag, caminda solemente lo Husticia lo dicidi si e procedura den Corte te awor a bay segun regla.
Kico esaki lo nifica pa representacion di Benny Sevinger den AVP? Aparentemente e yiu di Benny Sevinger lo bay representa su tata riba lista di AVP, dirigi pa Mike Eman.
Mescos cu ta e caso rond mundo, generacionnan nobo ta prepara pa participa na eleccion y asina gobernacion di nan pais.
Na Aruba por spera candidatonan politico nobo pero tambe partidonan nobo cu kier participa na eleccion 2025, cu sigur te awor ta sumamente atractivo, pasobra Gobierno Evelyn Wever Croes, cu a hereda un caos, lo entrega un Aruba renoba y cu posibilidad di un futuro briyante pa wordo goberna.
Hustamente un situacion cu ta haci participacion na Gobierno mas alentador pa tur cu ta yama nan mes politico, pero cu si nan no ta sirbi pa continua cu e bon trabou, por pusha Aruba atrobe den desastre pasobra Geert Wilders sigur lo no perde tempo cu mas deliberacion, pero lo tuma accioncu Gobierno di Reino tin permiso ta tuma!
