Culminacion intervencion financiero di Reino na 2014 elimina
- Morto di democracia a wordo preveni cu eleminacion di COHO
- Parlamento awor mester evita otro humiliacion estilo Knops
ORANJESTAD (AAN)- Loke tabata na wega for di 2020, ora e Pandemia Covid-19 a deshaci di e plannan original pa maneho financiero di Gobierno Evelyn Wever-Croes, tabata e sistema democratico di Aruba.
Statuut ta regla e relacion entre paisnan den Reino.
Tambe Statuut ta e fundeshi pa garantisa e bienestar di Aruba y di tur Arubiano como ciudadano Hulandes, manera for di nan nacemento nan nacionalidad y pasaporte ta regla.
Ta e bienestar directo di e Arubiano como ciudadano Hulandes, ta motibo cu Statuut ta entrega Reino autoridad, pa interveni si e por duna prueba cu e bienestar di e Arubiano ta na peliger.
Democracia cu no ta basa riba bienestar di politiconan ni gobernantenan pero riba e bienestar di ciudadanonan cu no por wordo pone na peligro, tabata e motibo cu e areglo pa autonomia (gobernacion propio) di Aruba, no por a stroba posibilidad pa Reino interveni y tuma pasonan necesario pa evita por ehempel dictadura, kiebra di derechonan y bienestar di tur Arubiano awe y den futuro.
Manera DIARIO a splica na tanto ocasion, e necesidad pa un bon maneho financiero di e pais como garantia di bienestar di e Pueblo, ta hancra den e leynan cu ta dicidi con un gobernante por gasta placa di Pueblo, cu aprobacion di Parlamento y asistencia y hasta vigilancia di instancianan gubernamental imparcial cu ta conseha politiconan den man maneho.
Na 2014 e bom a rementa, ora Hulanda a presenta na Aruba, cu a conoce un epoca nobo durante cual supervision financiero di Hulanda a wordo introduci.
E vigilancia Hulandes riba e forma cu politiconan ta atende cu placa di e Arubiano, a bira realidad y medidanan mester a cuminsa wordo tuma.
Crea debe pa paga den futuro, tabata completamente contra democracia pero tambe contra e garantianan di Statuut den proteccion di e bienestar di e ciudadano Arubano, manera a bira visibel na 2018 ora medidanan pisa mester a wordo tuma pa Aruba cuminsa paga debenan cu a acumula cu e creacion di e debe nacional conhuntamente cu e proyectonan “hunga politica y Pueblo paga despues” di PPS, base di Bo Aruba.
Na 2020 Gobierno Wever-Croes a logra e prome calculacion nacional di cifra, presupuesto, na momento cu Covid-19 a basha tur planificacion abou y a laga Aruba sin entrada ora hasta mester a cera porta pa turismo.
Ta den e situacion aki cu tabata inespera pero pa cual Reino a incorpora exigencia na Statuut, e Secretario di Estado Hulandes, Raymond Knops por a duna prueba di su arogancia cu e mester a yama “actitud orthodox” pa declara cu Aruba tabata un pais bancarota.
Un acusacion corecto pasobra si Aruba tabata un compania, lo el a wordo declara bancarota.
Sinembargo, Knops a uza e ocasion aki pa introduci un sistema den cual un Ley di Reino, COHO ta wordo introduci y ta elimina e responsabilidad di Parlamento como representacion di Pueblo pa dicidi con Gobierno ta gasta placa di Aruba.
Knops a introduci COHO pa manera e mes a bisa, por “a dal riba debe di Miembronan di Parlamento” cu ta un humiliacion.
Knops a referi na un costumber di antes, den cual maestronan na school tabata usa un liniaal (regla di medida), pa dal mucha riba nan dede, como castigo.
DIARIO a bay contra e actitud di Knops y e forma cu e kier a reforma cu COHO, pero a mustra riba e falta di responsabilidad di Parlamento den pasado, cu ta wordo marca pa e fondo di 1.6 Biyon cu Parlamento a entrega Gobierno Mike Eman sin posibilidad di control y awe entre otro ta motibo di e desastre na Hospital.
Gobierno Wever-Croes a cuminsa atende cu e asunto y e paisnan Hulandes den Caribe a uni, bou guia pa cual nan a scoge di Prome Ministro Wever-Croes, y a bay contra posibilidad di COHO, intervencion Hulandes a base di un Ley di Reino contra Parlamento.
Sinembargo, semper DIARIO y Gobierno Wever-Croes y tur ciudadano cu kier mira realidad di Aruba, a sostene e necesidad pa reforma e situacion financiero di Aruba.
E acuerdo cu Aruba a alcansa awor cu Hulanda, ta di acuerdo cu Statuut cu for di 2014 a exigi cambio den abuso di placa di Arubianonan y pais Aruba.
Sinembargo awor no ta humiliacion politico manera hancra den COHO, pero a base di leynan basico, democratico, di Aruba, Parlamento mester percura pa tur Gobierno di turno uza placa di Pueblo na un forma democratico.
Tin un diferencia pues sumamente grandi entre e formula di Raymond Knops y e areglo awor alcansa pa reforma financiero di Aruba di acuerdo cu exigencianan di bon gobernacion.
