Na 2017 Florin tabata na peliger y economia rehen di Nicolas Maduro
*E atake mundial di Covid-19 tabata reto extra ordinario pa Aruba
*Baha gastunan di gobernacion a bira arma principal di democracia
ORANJESTAD(AAN)—Ariba e prome dia di Maart na 2024, mundo a observa e fecha di 11 di Maart 2020, ora mester a decreta Covid-19 como pandemia!
Te awe cantidad di hende ta muri y rond mundo pashentnan di Covid-19 mester haya atencion, sea pa e hecho cu ainda nan por bira victima di e enfermedad of pasobra nan ta victima di Long Covid, cu ta caracterisa mas y mas e manifestacion di e malesa ainda na nivel mundial.
Pa analisa e situacion actual pa asina por enfrenta retonan cu futuro lo trece, nunca mester perde logronan di pasado for di bista.
E lucha di Aruba pa e tin su propio gobernacion a haci, cu Gobierno di Aruba por a tuma mayoria di su medidanan, na un forma autonomo a base di su Status Aparte.
E cooperacion nobo den Reino a haci cu e por a goza di beneficionan como parti di Reino y coopera cu otro paisnan, pero na mes momento por a tuma medidanan sin mester busca aprobacion pafor di Aruba.
Con importante bon gobernacion financiero di un pais ta, a bini dilanti na 2020 ora Covid-19 a ataca pero na momento tambe cu Aruba mester a crea un base economico nobo despues cu e proyecto di Citgo a fracasa y a laga Aruba for di 2017 atras den un confusion financiero, economico y social total.
Ta for di 2017, e forma cu Aruba lo por a enfrenta e paralisis economico cu a pone un fin na tur entrada financiero di Aruba, a bira mandato cu Aruba a entrega Gobierno Evelyn Wever-Croes, despues cu Aruba a retira su confiansa absoluto den maneho di Gobierno Mike Eman.
Pa comprende e balor inmenso di recuperacion di Aruba y e alivio di Aruba na e momentonan aki, mester bolbe na 2018 ora Gobierno Evelyn Wever-Croes a acepta su herencia cu un proyecto di Citgo cu a muri prome cu el a nace pero si a laga atras te awe su rastronan.
E euforia falso di e proyecto di Citgo, a laga no solamente Aruba pero tambe cantidad di Arubiano cu debe pa paga na casnan comercial y banco a base di prestamo pasobra Citgo ta bini.
E hecho cu Gobierno mester a lucha cu e debe nacional, Pueblo di Aruba mester a lucha cu e debenan personal pero tambe cu e gasto di paga debe di proyectonan PPS cu a planea sin placa.
Ora a planea e proyectonan PPS, Gobierno Mike Eman a a actua contra e base financiero di e Ley cu ta Regla con ta gasta placa di Pueblo, cu ta e Ley di Contabilidad cu practicamente a muri mal morto na man di e miembronan di Parlamento cu a sostene Gobierno Mike Eman.
Contra ley, Gobierno Mike Eman a entrega Aruba e peso financiero cu a explota ora Aruba a wordo confronta cu Pandemia Covid-19 y mester a cera su economia y deshaci di e plannan di reforma financiero di Aruba.
Dia 11 di Maart 2020, Covid-19 a ataca Aruba cu dia 21 di September a instala e Gobierno Evelyn Wever-Croes 2.
Na 2024, Aruba ta hubila pasobra Aruba a logra cu su entradanan ta cubri su gastonan loke ta nifica cu Aruba por papia awor di un gobierno realmente democratico y manera Ley ta exigi.
Na 2024, mientras ainda mester vigila e peligro di Covid-19 cu no a desaparece pero tambe recupera cu e recesion di 2022 y ta prepara pa tur resultado di guera rond mundo, Gobierno Evelyn Wever-Croes ta entrega mundo e unico formula pa bon gobernacion, cu ta basa riba e forma corecto cu Gobierno ta gasta placa di Pueblo manera Ley di Contabilidad ta exigi.
Un ehempel grandi di bon uzo di placa di Pueblo, ta bini dilanti den e salarionan cu Gobierno Wever-Croes ta paga na trahadornan di e oficinanan di Prome Ministro Evelyn Wever-Croes.
Compara cu 2017, ora ya Hulanda a baha Mike Eman for di Fort Zoutman y Aruba a wordo poni bou supervision financiero, e suma cu awe Pueblo mester paga pa e empleadonan di oficina di Prome Ministro a baha cu 80 porciento.
Dia 18 di Maart 2024, Aruba ta hisa su bandera y su himno den un situacion mundial sumamente dificil.
Pero dia 18 di Maart 2024, Gobierno Wever-Croes na nomber di Pueblo di Aruba, ta entrega mundo e prueba kico un gobernacion democratico realmente ta encera a base di ley, cu no ta permiti un maneho di Gobierno pusha Pueblo den debe y pobresa, pero ta exigi un maneho di Gobierno cu ta siña Pueblo responsabilidad sin aventura, pa por alcansa exito!
Cuatro aña pasa, Aruba mester a cera su economia pa motibo di Covid-19. Kico lo a pasa si ya Gobierno Wever-Croes a pone Aruba rumbo di un maneho financiero responsabel!
