Minister Ursell Arends:
*Cu naturaleza no ta un obheto pa ser explota!
ORANJESTAD (AAN) -- “Reconociendo e derechonan aki di Naturaleza, nos ta afirma cu naturaleza no ta un obheto pa ser explota pero e ta un suheto bibo cu derecho inherente”. Asina Minister Ursell Arends, a expresa den e conferencia di prensa di Diahuebs, despues di a introduci su proposicion di bin cu e Ley di Derechonan di Naturaleza.
E reconocimento aki ta percura pa e base fuerte pa e instrumento legal necesario pa proteha nos herencia: naturaleza! E caminda pa asegura un
futuro sostenible ta uno cu nos tin cu can’e hunto”, Minister Arends a subraya.
Proceso di consulta cu cada ciudadano:
E dignatario a agrega cu e Ministerio di Naturaleza ta invita cada ciudadano pa participa den e proceso di consulta.
“Bo pensamento, bo sugerencianan y bo comentarionan, no ta solamente di balor pero pa nos ta esencial. Nan lo wordo considera cuidadosamente, y e por causa cambio vital den e proposicion di ley aki mientras e ta canando su caminda legislativo formal prome cu e wordo presenta na Raad van Advies. Mi ta haci un suplica na tur ciudadano di Aruba na comparti su voz cu nos, atravez di e link: https://publico.aw/consulta/. Pero tambe bishitando: publico.aw pa lesa e proposicion di ley, y tambe den e tab di consulta bo ta haya e proposicion di e ley aki.
Tene cuenta cu e proposicion di ley ta na Hulandes, mirando cu nos sistema legislativo ta na Hulandes. Bo feed Back por wordo comparti di forma anonimo pa asina nos por fomenta e dialogo na un manera transparente y activo cu cada un di e ciudadanonan cu por comparti esaki cu nos.
Desde 14 di Maart te cu 4 di April e link lo ta habri online pa asina aki ricibi feedback. Pueblo tin e oportunidad pa comparti su feedback te cu 4 di April, pues un bez cu bo lesa e ley, bo tin e formulario cu ta aparece cu bo por provee nos cu bo sugerencia of comentarionan riba e proposicion di Ley. Y si bo tin cualkier pregunta bo por email na عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته. y asina aki nos por comunica cu e ciudadanonan cu tin interes y ta para pa derechonan di naturaleza”, Minister Ursell Arends a relata.
