Directora di Stichting Reclassering Seraida Pemberton-Leonard
ORANJESTAD (AAN) -- Stichting Reclassering en Jeugdbescherming, ta e Instancia cu ta atende cu e hobennan cu ta haya nan mes den problema cu husticia, y locual dicho instancia ta señala hopi ta, cu varios di nan ta den gang of ta afilia na un grupo. Asina señora Seraida Pemberton-Leonard, directora di Reclassering, a menciona den entrevista cu DIARIO.
“El a resulta hopi dificil pa Reclassering cera gruponan pa duna nan e guia necesario, dus e dos programanan. E aña aki nos por a duna un programa so, pero esey ta hopi dificil pasobra bo tin cu tene cuenta cu ken bo ta hinca den e grupo, cual hoben, cual bario, y esey ta stroba hopi proceso di traha afspraak tambe, pasobra no por traha cita cu ken cu ta den bo oficina, teniendo na cuenta ken ta e otronan cu ta bin”, Pemberton-Leonard a señala.
Pemberton a sigui bisa cu direct y indirectamente e problematica di hobennan cu ta den gang ta stroba e proceso di duna e hobennan e guia necesario. “Hopi di nan tambe ta geef aan cu door cu nan ta wordo menaza of cu nan ta haya nan mes den problema cu otro hobennan, loke nos ta wak ta cu nan ta laga sa cu nan ta cana cu arma pa proteccion. Nan ta sinti nan mes insigur, y nan ta bisa cu nan no ta den un gang pero nan toch tin cu cana arma pa sinti nan mes mas sigur”, Directora di Reclassering a duna di conoce.
Refiriendo na edad, señora Pemberton a indica cu e grupo cu ta duna mas señalnan di esaki ta entre 15 cu 21 aña. “Cerca nos ta hobennan cu ta cay den man di husticia. Pero aworaki, nos a cuminza cu e proyecto H.A.L.T. tambe, y esey ta pa hobennan cu ta haya nan mes den problema cu polis pa delitonan hopi leve, pero aunke e delito por ta hopi leve cu nos por duna asistencia pa yuda nan, e problemanan cu e hobennan aki tin; problemanan social, di gang, financiero, ta hopi pisa. Hopi mas bo ta wak tendencianan di problemanan multiple”, Pemberton-Leonard a indica.
