ORANJESTAD (AAN) – Randall Chaves y Yuri Fallas ta dos periodista costaricense, coresponsal di e Planta di Television Teletica, Canal 7 di Costa Rica,
na e Municipio di Perez Zeledon, Zona Sur y alrededor. Nan ta un matrimonio cu ta traha hunto y durante nan vacacion, nan ta probecha cada bez cu ta posible, bay den exterior y haci un reportahe di e pais cu nan ta bishitando.
E biaha aki nan a bin bishita Aruba, nos “one happy Island” unda nan a yega Dialuna 15 te cu Diabierna 19 y nan a keda encanta cu nos dushi Isla.
Durante un entrevista cortico cu e redactor di DIARIO Mercedes Monge, nan a expresa kico tabata nan experiencia durante e dianan aki.
Apenas nan a instala den un apartamento na Palmitastraat, na Ponton, mesora nan a sali cana, pasobra un di nan placernan precisamente ta cana distancianan largo. “Nos a cana hopi te anochi un tiki laat, y nos ta admira con trankil e Isla aki ta” nan a bisa.
Nan a bishita e beachnan Eagle Beach, Bushiri Beach, Baby Beach, Palm Beach, y Arashi. “Tur e beachnan ta hopi bunita, pero nos a haya Arashi specialmente espectacular. Nos a cana y explora e Faro cu ta super bunita”, Jury y Randall a expresa.
Locual a hala mas nan atencion ta nos lama, e color blauw turkesa cu su diferente tono, su awanan transparente, su santo blanco y limpi, y sunsetnan sublime, cu ta inspira na e romanticismo. E solo oranje cu ta baha den e horizonte unda cu ta parce cu e cielo ta hunta cu lama. “Lama di Aruba ta lo maximo!” Yuri a expresa.
Di punta pa punta nan a recore Aruba, y nan a gusta e Distrito di San Nicolas masha. En general nan ta haya cu nos hendenan ta hopi amable. Unico cos cu nan mester a siña deal cu ne ta e prijsnan. “Prijsnan ta exorbitante. Cuminda, gift, un refresco, etc”, Randall a bisa, pero no den forma di keho pero di sorpresa. Nan a subi tram, cu nan a haye interesante y a goza di e experiencia aki.
Nan a tuma diferente grabacion y no obstante e prijsnan halto di Aruba, nan lo recomenda e costaricensenan pa bishita nos Isla, pasobra tin hopi di ofrece, un lama unico, gentileza di su hendenan amicable, un bunita clima y mucho mas. Nan lo bolbe Aruba cu poder di Dios.
{gallery}Randall y Yuri, coresponsalnan di Teletica na Costa Rica a bishita Aruba y a keda enamora di dje{/gallery}
