Kevin Jessurun di Caribe Hulandes tabata uno di e 298 victima
*Kico mundo por spera cu e Guera di Ukraine den luz di realidad
*196 famia Hulandes a yora morto di anciano, hoben y baby
ORANJESTAD(AAN)—Tabata dia 17 di Juli, 2014, cu Reino Hulandes a conoce consternacion grandi.
Buelo 17 di Malaysia Airlines, cu a lanta buelo for di Schiphol, tabata na caminda pa e aeropuerto di Malaysia y tabata bula riba e parti oriental riba Ukraine, ora el a perde contacto pa medio di radar.
A bortdo di e avion tabata tin 298 persona, di cual 196 tabata tin pasaporte Hulandes. Uno di nan tabata Kevin Jessurun, biba na Curacao pero hopi conoce na tur e e islanan Hulandes den Caribe y den henter Reino pa su actividadnan.
E tabata yiu di un persona conoci den e mundo di comunidad y comercio na e islanan y tabata constantemente di biahe.
Dia 17 di Juli e tabata a bordo di e avion Boeing 777, cu no tabata tin ningun problema di motor y nada cu por a haci cu e pasaheronan a bordo por a pensa cu nunca nan a yega nan destino.
Sinembargo, awe na 2023, ta e buelo aki ta haci cu henter mundo ta recorda, kico por spera di Vladimir Putin, cu a menasa mundo hasta cu arma nuclear si su poder ta na disputa.
E avion tabata yena cu hende completamente inocente. Portretnan cu despues lo a alcansa tur parti di mundo, tabata mustra e caranan di ancianonan, pero tambe di baby y hobennan na caminda pa otro destinacion den nan bida, cu tabata a punto di alcansa su final.
Nan tabata bula riba e parti Oriental di Ukraine, caminda separatistanan cu sosten di Putin di Rusia, a wordo ekipa cu un instalacion di raket cu tabata permiti nan, destrui un avion den plano buelo.
Na 2023 ainda mundo no a termina cu e investigacionnan hororoso, cu mester dicidi si e condena di tres sospechoso, por haci posibel pa cera e investigacionnan of si mester continua cu e persecusion.
Mundo ta prepara pa recorda e suceso hororoso, na momento cu mundo ta puntra su mes si Vladimir Putin ta capaz pa duna orden pa lansa un bom atomico.
Pa por a yega na un conclusion di e investigacion, un grupo di Hulanda, Malaysia, Belgica y Ukraine ta haci investigacion, cu awor lo ta indica cu Vladimir Putin a duna su aprobacion pa uza e ekipo cu cual por a destrui e avion yena cu hende inocente den pleno buelo.
Na diferente ocasion, e team di investigacion a relata resultadonan di su investigacion. Na 2019 a yega na e conclusion cu cuatro persona lo mester a wordo tene responsabel pa e morto di e 298 personanan cu tabata a abordo di e avion como pasahero of miembro di tripulacion.
Un persona a sali liber y e resto a wordo condena na bida largo mientras a sigui traha riba e caso.
Durante e ultimo encuentro di e grupo internacional, a wordo menciona cu un consehero importante di Presidente Ruso, Putin, tabata parti di e proceso pa uza e instalacion pa lansa e raket.
E grupo investigador for di momento cu e Guera na Ukraine a cuminsa, ta reuni na Hulanda.
E famianan di e victimanan lo ricibi un compensacion cu hamas por reemplasa perdida di nan famia, cu a forma parti di e escenario di horor, cu restonan mortal plama.
Mundo ta ricibi un noticia na momento cu mundo ta puntra su mes di kico Putin ta capaz.
E mensahe cu e suceso cruel na 2014 ta entrega, ta cu por spera tur cos di un homber yama Vladimir Putin cu a destrui bienestar mundial na 2022 ora el a ataca Ukraine y a cuminsa menasa cu bom atomico!
