SAN JUAN: Departamento di Salud na Puerto Rico a laga sa riba diasabra, cu e cantidad di casonan confirma di bruela di macaco a pasa e cifra di 50.
Di e forma ey nan tambe ta uni na e organizacionnan di comunidad LGBTTIQ pa nan bay vacuna contra e monkeypox aki.
Riba Diadomingo mes, nan a start campaña di vacunacion, danki na un esfuerzo di e organizacionnan Coaí, Inc., tambe Puerto Rico para Todos, y True Self Foundation.
“Un biaha mas, mescos cu a socede cu Covid-19, nos a cuminza uni nos esfuerzo cu tur sector pa por trece salud na tur grupo di poblacion,” ta loke e secretario di salud, Carlos Mellado Lopez a bisa den un boletin.
E cita di vacunamento aki ta dirigi na personanan considera y identifica via e sistema di vigilancia y tracing di Oficina di Epidemiologia di Puerto Rico.
Nan ta pidi tur hende cu a wordo yama, pa nan bay proteha nan bida y asina evita di sigui cu e cadena di transmision y contagio, ta loke Mellado Lopez a insisti riba dje.
Puerto Rico a ricibi 2.807 dosis di e vacuna, y te cu Diasabra un total di 247 persona cu ta cay den grupo di riesgo a ricibi esaki. Nan ta pidi specialmente hendenan di comunidad LGBTTIQ pa cumpli cu e peticion pa bay tuma e prome fase di vacunacion aki.
