Christie Mettes, Project Coordinator a splica:
*Na fin di e proyecto ta spera di tin 10 sensor instala na Surfside Bay
ORANJESTAD (AAN): Christie Mettes, Project Coordinator, a duna di conoce den un rueda di prensa diamars mainta cu bou di e proyecto 'Surfside Science' un team di profesional y studiante local lo test y desaroya metodo pa monitor medio ambiente di e costa di Aruba pa un aña largo na Surfside Bay.
E instrumentonan lo midi calidad di aire y awa di lama, dinamica di costa y vegetacion bou awa.
RESEMBID ta un programa cu ta sostene desaroyo humano sostenibel di paisnan y teritorio Europeo den Caribe (OCTs), di cual Aruba ta parti. RESEMBID ta financia door di Union Europeo y su partner di implementacion ta Expertise France. E ultimo ta un agencia di colaboracion pa desaroyo di Gobierno Frances.
Surfside Science kier contribui na resiliencia di Aruba su ecosistema marino y di costa contra e impactonan di cambio di clima. Aruba, mescos cu hopi otro isla chikito den desaroyo, no tin dato di referencia, ni midimento continuo di diferente indicator ambiental.
Na fin di e proyecto, Surfside Science ta spera di tin 10 sensor instala na Surfside Bay. E data colecta lo bay di biaha riba e website sciencie.brenchies.com pa uso publico y por beneficia specialmente personanan local cu ta activo den area academico, fundacionnan, studiante y profesional.
E team diverso di hoben profesional y studiante local cu ta trahando hunto riba e proyecto aki ta:
Christie Mettes cu tin maestria den ciencia di medio ambiente ta e directora di e proyecto.
Anthony Sevold cu a studia ciencia di medio ambiente, matematica y fisica y ta traha den microbiologia, ta dirigi e investigation cientifico
Suyin Ridderstaat cu a studia comunicacion, mercadeo y ilustracion ta e coordinadora di media
Raydeline Wever cu ta un studiante di SISSTEM na Universidad di Aruba. Hunto nan lo studia cambio di e costa cu imagen di satelite
Manuel Rojas cu ta un studiante di Technische Universiteit Eindhoven di ingenieria electrico ta trahando riba calidad di awa
Alexandra Ulacio cu ta un studiante di SISSTEM na Universidad di Aruba
Sean Brokke cu ta un studiante di ICT na Fontys ta trahando riba calidad di aire
Ian Canninga cu ta un studiante di Ciencia y Tecnologia na EPI
Jeremy Granadillo cu a studia Media y Tecnologia na Rotterdam y ta trahando riba e ‘interface’ digital cu lo ricibi y analisa dato
Amaryllis Lee cu ta un studiante di Hogeschool Utrecht di Inteligencia Artificial
Tatiana Becker cu a studia ingenieria, medio ambiental y ecologia marino lo compara e metodonan desaroya durante e proyecto cu metodonan standarisa y cientifico
ScubbleBubbles cu ta un grupo di hoben cu ta ‘dive’ lo yuda verifica e imagennan di satelite
Cornerstone Economics lo explora opcionnan financiero pa sigui sostene e trabaonan menciona.
E proyecto a ricibi apoyo di DEACI y DNM pa por aplica pa e fondo y ta colaborando cu Universidad di Aruba y DNM den e desaroyo di e proyecto.
Riba e website sciencie.brenchies.com por mira caba algun sensor prototipo cu a wordo desaroya anteriormente cu sosten financiero di UNESCO y aki tambe comunidad por spera mas informacion di proyecto Surfside Science pareu cu e sigui avanza.
