Minister Geoffrey Wever:
- Di Plaza Nicky Habibe te Lagoen lo bira mas agradabel
ORANJESTAD (AAN) Den conferencia di prensa di gobierno, dialuna, Minister Geoffrey Wever ademas di e tema di luznan nobo pa cubri full Oranjestad, a papia tambe tocante e mantenimento di e matanan, reemplazo di bakinan di sushi, y drechamento Wilhelminastraat for di Plaza Habibe te Lagoen.
“Tambe nos a cuminza cu un proyecto di mantencion di matanan, nos a percura pa busca un compania pa busca un compania pa haci corte den tur e matanan, y planta matanan nobo na final di Caya Betico Croes, cu tabata tin hopi mata morto”, Minister Wever a indica.
E dignatario a señala cu asina a cuminza drecha e parti fisico: pues luz, mata, y tambe a cuminza cu e proceso di reemplaza tur e barinan di sushi. “A busca 50 di un material recicla na Aruba mes, asina tambe ta cumpli cu e compromiso di haci Aruba un pais mas sostenible, y envez di importa barinan di sushi di mercado internacional, nos a dicidi di acerca un compania local, cu ta bezig ta produciendo 50 baki di sushi di material recicla, cu ta bay wordo poni den centro di Oranjestad”, Minister Wever a duna di conoce.
El a splica cu ya a instala 20 caba, y cada luna lo pone 10 adicional, p’asina yega reemplaza tur e bakinan di sushi cu tabata den un estado deplorable. “Mi ta kere cu ta importante pa take care di tur e aspectonan aki, den centro di nos ciudad”, el a reitera.
El a agrega cu tambe e fase 3 di revitalizacion di Wilhelminastraat, ta den preparacion pa wordo ehecuta. “Ya aña pasa e destaho publico a tuma lugar, e fondonan ta aloca, y contrato a wordo firma cu contratista pa fase 3 cu ta full e area di Lagoen, unda cu ta bay reemplaza henter e parkinglot, drech'e full, percura cu tin su matanan”, e dignatario a comenta.
El a agrega cu hunto cu NV Elmar, a yega na entendimento cu ta bay instala 4 E.V chargers y tambe un sistema solar pa asina por produci energia renovable pa sigui hiba Aruba den e era nobo y percura pa Oranjestad wordo poni riba mapa, como un ciudad duradero, moderno, innovativo, Minister Wever a subraya, y a bisa cu asina henter e area di Wilhelminastraat ta keda renova, desde e Plaza Nikki Habibe te Lagoen, cu mata, luz y un infrastructura mas agradable.
