ORANJESTAD (AAN): Dialuna 21 di november, Departamento di Mucha y Hoben (DMH) conhuntamente cu Vereniging LVAK (Landelijk Vereniging Aandachtfuncionaris Kindermishandeling) di Hulanda
a organisa e prome recapacitacion di profesionalisacion p’e Supervisornan di Codigo y Train de Trainers di Codigo di Proteccion Aruba. Un total di 33 profesional for di 4 sectornan tabata presente na e training, cu a inicia pa 9:30 am y a termina pa 4:00 pm via di Zoom, cu 4 profesional ekipa y cu contenido relevante.
LVAK
Despues di a haya peticion di Nederlands Jeugdinstituut, a funda LVAK na 2012 y rapidamente el a comberti den e representante di mas grandi riba nivel nacional di ‘aandachtsfunctionarissen huiselijk geweld en kindermishandeling’.
E asociacion aki tin como meta primordial pa brinda sosten den forma oficial di violencia domestico y abuso infantil dentro di su organsiacion pa mantene y/of promove continuidad y experiencia den forma di anda cu violencia domestico y abuso infantil. LVAK tambe tin como meta pa funciona como un ‘normsteller’ di e pais pa e ‘aandachtsfunctionaris’, cual nos conoce como Supervisor di Codigo na Aruba.
Supervisor di Codigo (SdC)
Un SdC ta posiciona riba e ‘snijvlak’ di maneho y ehecucion dentro di su organisacion /departamento/instancia/fundacion. SdC tin un rol di duna conseho profesional riba e desaroyo di maneho y di coordina e ehecucion di e pasonan di Codigo di Proteccion, na momento cu tin sospecho di abuso di mucha. Un SdC ta e experto riba e tereno di CdP y ta contribui na un clima di trabou, unda e profesionalnan ta tribi, por y kier actua den caso di sospecho di abuso di mucha y violencia relacional.
Prome Recapacitacion SdC y Train de Trainers
A inicia e mainta cu Lydia Janssen, cu no ta desconoci na Aruba. E ta un consehero huridico y formadora den cuido y bienestar di hoben. Den su sesion a trata; con, unda y ki ora bo ta documenta concretamente, ken por tin ‘inzage’, con largo ta warda e documentacion y si esun involucra tin derecho riba coreccion/destruccion di su documentacion.
Despues a sigui cu e consecuencianan di stress toxico duna pa Xavier Moonen, un orthopedagoog-generalist y GZ-psycholoog y un emeritus hoogleraar na Universidad di Amsterdam y un emeritus lector na Zuyd Hogeschool na Heerlen. Den e sesion aki a trata: mucha y adulto den diferente suceso/situacion fastioso sea den un periodo largo of cortico y no ta haya (bon) sosten cu por tin impacto pa bida henter. Tambe a enfoca riba e posibel consecuencia di esaki y con por preveni stress toxico, como tambe con por yuda/guia y duna sosten na un colega cu a pasa den un situacion di abuso di mucha/violencia relacional.
E di tres orador tabata Belle Barbé, cu ta fundador di Wipsite, cu ta un website di educacion sexual y autor di e prome ‘sekspositieve voorlichtingsboek; ‘Ik & seks’ y ta traha como ‘gezondheidsbevorderaar’ pa GGD region Utrecht. A trata: e desaroyo sexual saludabel di mucha/hoben- y cua ta e situacionnan cu mester tin preocupacion p’e. A duna ehempel di caso ki ora un comportacion ta normal, preocupante y grave.
Finalmente a sera e dia cu Sanne Eggen, cu ta traha na un organisacion di ayudo di hoben y tambe tin su propio compania; Visie op Jeugd, unda e ta traha como trainer/lider di proyecto; Samen voor Veiligheid. Sanne a elabora riba: actitud basico den combersacion, inclui motivacion di e coleganan pa uza CdP. Stimula e coleganan pa rekeri un cooperacion real basa riba un actitud basico comparti, mirando cu como SdC bo tin rol di duna sosten y facilita e profesionalnan.
Na final mayoria di e profesionalnan a duna nan opinion y por considera e dia uno sumamente exitoso, yena di informacion relevante y cu contenido pa nan rol como Supervisor di Codigo y tambe Train de Trainers pa Codigo di Proteccion. Intencion ta, cu tur aña ta keda organisa dia di recapacitacion conhuntamente cu LVAK, mirando cu DMH y LVAK ta trahando riba e pasonan concreto pa bira un ‘zusvereniging’. DMH ta gradici LVAK y tur e Supervisornan di Codigo como Train de Trainers, sin laga afo e directornan di e instancianan concerni, pa brinda e espacio y oportunidad pa haci esaki posibel p’e 33 profesionalnan na Aruba.
