Su experiencia personal - ORANJESTAD (AAN): Den su discurso na e evento espectacular pa hende muhe cu ta den un posicion di liderazgo, “Women Let’s Talk Forum” organiza pa Marriott Hotel,
Prome Minister Evelyn Wever-Croes a comparti con e ta maneha tur e stress y retonan diario cu e ta encontra.
“Mi ta kere firmemente den inspira otro. Mi deseo ta pa inspira un hende cada dia y mi ta haci esaki door di comparti mi experiencianan. Al final mi ta kere cu tur ser humano ta igual y nos tur tin nos retonan tanto na trabao como na cas, cu yiu, nietonan, casa, mama of tata, salud of financieramente”, Prome Minister a enfatisa.
Prome Minister a remarca cu pa logra maneha retonan, no mester tin miedo pa faya pasobra como ser humano nos ta faya y door di faya nos ta siña. Nos no mester tin berguensa pa faya.
“Ami a kere un tempo cu mi no por faya y a purba di haci tur cos corecto pa no faya. Pero cu añanan mi a siña cu faya ta parti di bida y cu nos no mester forsa nos mes pa no faya sino lanta back cada bes cu nos faya. Esaki sigur ta algo cu nos como famia of amigo/a mester ta consciente di dje. Nos no mester ta contento cada bes un hende faya sino duna un man na e persona e momento ey cu mas e tin mester di dje”, Prome Minister a expresa.
Prome Minister a acentua e importancia pa ta den balans, pa busca balans of pa trece balans den su bida y esaki el a siña durante añanan door di su propio fayonan. Prome Minister a duna di conoce cu tin 5 area den su bida cu ta hopi importante cu ta yude alcansa y logra e balans den su bida pa maneha y logra pasa door di retonan diario.
TUMA TEMPO PA RELAHA: “Den mi caso e dianan y anochinan por ta interminabel, pero esaki mi a siña: Tin un limite na loke mi por maneha metalmente y fisicamente y mi tin cu check cu mi mes y tuma tempo pa “reset”.
Pa tuma decisionnan importante mi mester ta den un bon estado mental. Aunke mi no ta perfecto, mi ta haci mi best pa tuma tempo pa haya e balans y tuma tempo pa relaha. IDEANAN: Pa mi e momentonan pa relaha por ta tumando tempo cu mi famia, lesa un bon buki, medita, of bebe un kopi te mi so pafo cu mi pensamentonan”.
FAMIA: “Mi mester ta sigur cu tur cos ta ok cu mi famia y na cas pasobra si algo no ta bon e ta trece un desbalanse den ful mi dia. E no ta facil pa balansa famia y trabao y ta tuma hopi pasenshi y organizacion. IDEANAN: regla cu bo famia y amigonan con pa dividi cierto tareanan, manera hiba yiu scol, hiba nan les, deporte, musica etc. of cualkier cos cu mester worde haci prome cu bay trabao.
TRABAO: Trabao ta importante pasobra ta asina nos por mantene nos famia. IDEANAN: Cumpli cu bo debernan, organiza bo trabao trahando hunto cu coleganan, haci aliansanan. Ora ta concerni bo crecemento profesional nunca asumi, semper puntra prome kico bo por expect y kico ta expect di bo. Evita discusionnan innecesario. Bida ta hopi complica caba pa bo ta complica e mas na trabao.
SPIRITUALIDAD: Pa mi, mi fe ta importante. Fe y oracion ta duna mi e forsa y calmo durante temponan dificil. Tin hende ta kere den Dios, otro den universo. Tin cu ta resa, otro ta medita. Haci loke ta trece un balans pa bo den bo bida.
SERVICIO: Mi “motto” ta: “Door di duna bo lo ricibi hopi mas di loke bo por duna”. Por ta esaki ta e motibo pakico mi e scoge politica pasobra mi ta kere den sirbi y no den worde sirbi. Esaki ta trece un balans den mi bida”.
Asina, Prome Minister di Pais Aruba ta trece balans den su bida tur dia pa por mantene su salud mental. Premier a enfatisa cu na fin di dia loke ta mas importante pe ta cu e ta haci bon pa otro y cu e por biba cu e resultado y consecuencianan di e decisionnan tuma. Esaki sigur ta aplica pa tur trabao y tur circunstancia. No ta importa si bo ta traha na hotel, of como docente, Polis of Prome Minister, nos tur tin nos retonan y nos tur tin cu deal cu nan.
“Tin dianan ta mas facil cu otro, pero riba e dianan malo, sa cu solo lo sali atrobe cu oportunidadnan nobo pa por deal cu e problema y oportunidadnan nobo pa haci lo corecto. Esaki ta loke ta traha pa mi. Mi ta spera mi por inspira cada hende muhe pa por busca loke ta traha pa nan y pa por comparti esaki cu otronan. Bo no sa nunca ki problema un persona tin y kico e lo ta pasando door di dje. Por ta cu abo ta e persona cu por yude”, Prome Minister a duna di conoce.
