ORANJESTAD (AAN) -- Dialuna awo, dia 16 di September 2024, Gobierno demisionario a tene su conferencia di prensa,
den cual a hiba palabra Prome Minister mr. Evelyn Wever-Croes y Ing. Marlon Croes, director di DOW.
PERIODO DEMISIONARIO:
Na prome lugar Minister Presidente a elabora tocante e periodo demisionario y el a menciona cu eleccion a wordo yama pa dia 6 di December, y desde Dialuna siman pasa gobierno ta demisionario.
“Kico kiermen un gobierno demisionario? Nos a haya hopi yamada e dianan aki di hopi hende cu pregunta y p’esey mi kier duna mas informacion awe. Ora cu un gobierno ta demisionario, por tuma decisionnan solamente riba asuntonan coriente. Pues, ta trata di decisionnan, proyecto, maneho, cu ya caba tabata tin un decision toma, prome cu gobierno a bira demisionario y cu ta presupuesta den e presupuesto cu gobierno a aproba pa aña 2024” e dignatario a splica.
E mandatario a expresa cu p’e ta mas concreto el a splica kico esaki ta nifica. El a mira un rato na su ministerio y su departamentonan concerni.
El a menciona, por ehemplo, DOW y DIP cu ta atende cu bouwvergunning. Si un hende a aplica pa un bouwvergunning esaki ta un procedure coriente, pues e no tin algo di haber cu e minister, ni cu gobierno, pero e ta den ehecucion cerca e departamento, pues e por sigui.
Mescos si tin peticion entrega pa tereno, y esey ta cay pa Departamento. Esey ta cay na Departamento di DIP, y door cu a depolitiza e proceso, ningun minister ta firma pa tereno, pues ta un proceso cu por sigui normal.
“Por cierto, entre parenthesis, loke mi por bisa si, ta cu e cantidad di terenonan disponible ta limita na Aruba, y p’esey e ta dificil pa otorga tur hende cu pidi un tereno, pero manera mi a anuncia, ya caba, algun siman pasa, a identifica un lista di 500 tereno, cu ta cla pa wordo duna, y ta identificando mas tereno pa duna esnan cu a pidi pa nan traha nan cas. Pues, esaki ta procedurenan normal cu ta sigui”, e mandatario a reitera.
Premier Wever-Croes a agrega cu si mira mas leu, por ehemplo e Ministerio di DIMAS unda hende ta pidi permiso pa trabao, esaki ta trabaonan cu ta sigui normalmente. No tin nada di haber cu e periodo demisionario di gobierno. “Of si bo wak e tema di impuesto, si tin cu haya placa bek tambe bo por haya esey. Mescos ta conta tambe pa Departamento di Recurso Humano, si un trahado ta na espera di un promocion of cualkier otro asunto cu tin di haber cu recurso humano, esaki ta cosnan cu ta sigui nan caminda normalmente, con tal cu ta algo cu a cuminza ya caba prome cu gobierno a bira demisionario, y cu ta presupuesta”, Minister Presidente a reitera.
