ORANJESTAD (AAN) – Minister Presidente Evelyn Wever-Croes a splica den Parlamento, relaciona cu e Rapport Forensic di Refineria di Aruba (RdA),
cu otro tema importante ta cu tabata tin otro compania cu tabata di Valero, yama “Valero Marketing & Supply Aruba NV, cu dia 4 di October a cambia di nomber pa: “Fuels Marketing & Supply Aruba” (FMSA). “Dus, esaki no tabata un compania nobo sino un compania existente cu a cambia di nomber”, e mandatario a reitera.
E mandatario a declara cu e prome biaha cu e miembronan di Hunta di Comisario a wordo registra, ta e dia cu el a tuma e cartera y despues di algun siman di a aclimatiza den e funcion, el a cambia e Hunta di Comisario y eynan a mira cu cosnan a cuminza cambia.
“E fiesta, e bagamunderia, e bochorno cu bo ta weita den e rapport aki, a caba na e momento ey, ora nos a pone hendenan drechi na cabes di e supervision di e compania aki. E ora ey numa nos a mira Hunta di Comisario registra na Camara di Comercio, algo cu bao di e gobierno anterior no a tuma lugar”, e dignatario a reitera.
El a sigui splica cu na momento cu Gabinete Wever-Croes a apunta miembronan nobo den Hunta di Comisario, cada un a haya un map di e compania, pasobra e director ta esun cu tin cu encarga su mes pa informa e Hunta di Comisario, anto den nan tabata para tur e reunionnan cu, supuestamente, tabata tuma lugar di e Hunta y di e shareholders. Na e momento ey a wordo bisa cu solamente cuater tabata tin, y despues di e investigacion aki a bin resulta cu tabata tin hopi mas reunion, cu hasta na momento di e traspaso di un hunta pa e otro, e directie di RdA a nenga di duna e hunta nobo, tur documento cu tabata necesario na e momento ey, pa nan por a haci nan trabao. Akinan caba, por a mira con a cuminza sconde cos, pa e realidad y berdad no bin padilanti”, Minister Presidente a remarca.
El a sigui splica cu na Februari 2017 e Hunta di Comisario, desde 2016 tabata consisti di Franklin Hoevertsz sr. E tabata President van Commissaries, Nathalie de Vos, Allison Williams y Luciano Milliard.
“Nan tabata e comisarionan y na e reunionnan aki e Mike de Meza himself, tabata asisti como minister. Y esaki ta e nomber di e personanan cu ta mayormente responsable di tur loke a tuma lugar den e compania, pasobra nan a laga di haci nan trabao manera nan mester a hacie.
“Ora bo apunta un Comisario den un Hunta di Comisario, ta pa tene supervision, y nan a faya den esaki drasticamente di no a haci un traspaso debido na e Hunta nobo, y cu e minister cu tabata encarga e tempo ey, Mike de Mesa tampoco a haci un traspaso debido, na e minister cu a bin despues cu ta mi persona; el a duna mi cero informacion, cero documento, y e unico cu a haci un traspaso cu tin di haber cu RdA, tabata ex-minister Angel Bermudez y e tempo ey ex-minister Richard Arends cu a laga e contractnan di CITGO riba un lesenaar poni, pero nada mas cu esey”, Premier Wever-Croes a señal.
