Durante su viahe den Caribe Hulandes...
ORANJESTAD (AAN): Prome minister Schoof, di 9 te cu 14 di mei, ta bishita Boneiro, Aruba, Corsou, Sint Maarten, Saba y Sint Eustatius. E bishita di cera conoci ta den e cuadro di Reino den un mundo cu ta cambiando.
Banda di encuentronan cu gobernado-, prome minister- y miembronan di Staten di Aruba, Corsou y Sint Maarten y gezaghebber- y consehonan insular di Boneiro, Sint Eustatius y Saba, e bishita ta encera un programa diverso.
E bishita ta cuminsa na Boneiro, unda e prome minister lo profundisa su mes den historia y naturalesa, pa despues e tene diferente combersacion riba e isla.
Riba 10 di mei e ta continua su biahe pa Aruba. Aki e ta bishita un empresa local y e ta bishita Hospital Horacio Oduber y Korrektie Instituut Aruba (KIA). E prome minister ta sali 11 di mei pa Corsou, unda e ta haya un recorido na e base di marina.
E siguiente dia e ta sigui su biahe pa Sint Maarten, unda e lo keda informa tocante temanan di desaroyo economico, reconstruccion y bon gobernacion. Riba 13 di mei tin bishitanan na Saba y Sint Eustatius riba e programa. Na Saba e prome minister, lo bishita dos proyecto grandi: waf y desaroyo di St. Johns. Aki ta construyendo un sala di deporte, un scol tecnico y un asina yama 'enrichment center'.
Na Sint Eustatius ta sigui un recorido den cuadro di Statia 2026. Na final di e dia prome minister Schoof ta bolbe biaha pa Sint Maarten.
Riba 14 di mei tin riba e programa entre otro un bishita na e Cruise Terminal den cuadro di desaroyo economico, na Courthouse y na proyectonan di reconstruccion cu a inicia despues di e destruccion causa pa horcan Irma na 2017.
