8 di maart, Dia di Hende Muhe;
*Inspira inclusion di hende muhe
ORANJESTAD (AAN): Mundialmente ta celebra Dia Internacional di Hende Muhe riba 8 di maart. Esaki ta un dia cu tur hende ta para keto y evalua e rol di hende muhe den comunidad. Esaki tambe ta un dia unda ta reconoce e hende muhenan pa e lucha pa progreso. Gobierno di Aruba ta kere den stimula e hende muhe pa mas y mas asumi e rol cu nos ta desea e hende muhe asumi.
Prome Minister Evelyn Wever-Croes en conexion cu e Dia di Hende Muhe, ta extende un invitacion na henter e pueblo di Aruba, pa reserva e fecha, 8 di maart, pa asina celebra e dia importante aki hunto cu Gobierno di Aruba.
Pa cu e celebracion aki, cu lo hiba e tema, Inspira Inclusion di Hende Muhe, lo invita oradornan, cu lo inspira tur ser femenino cu nan mensahe pa specialmente pone rol di hende muhe central. Tambe lo tin un session di ‘panel discussion’ riba tema di inspira inclusion di hende muhe.
E aña aki, Nacionnan Uni, relaciona cu e dia aki, a bin cu e tema "Inspire Inclusion", pa trece e mensahe, cu na momento cu nos inspira otronan pa compronde y balora inclusion di hende muhe, nos ta creando un miho mundo. Y na momento cu e hendenan muhe ta inspira pa ta inclui, nan lo crea un sentido di pertenencia, relevancia, y poder. “Tin un dicho famoso cu ta bisa: “Hende muhe ta manera un saco di te, bo no sa con fuerte un hende muhe ta, te ora bo hinc’e den awa cayente. Y esaki ta e mensahe cu nos kier pasa pa tur hende muhe na Aruba”, Prome Minister a expresa.
Tur informacion relaciona cu e celebracion aki, lo wordo anuncia den e siguiente dianan nos dilanti. Keda pendiente y reserva e fecha, 8 di maart pa hunto celebra e dia aki.
