Lider di proyecto, Sue-Ann Ras:
ORANJESTAD (AAN) – Den entrevista cu Sue-Ann Ras, Lider di e team di e proyecto Codigo di Proteccion, el a indica cu durante henter aña nan a traha y na November nan ta pone un poco mas atencion special, na locual ya caba nan ta haci.
Nan enfoke ta e “Tratado di Derechonan Internacional di Mucha” y na November nan ta pone mas enfasis riba dje. Ras a indica cu den principio nan tabata tin un exitoso recapacitacion di e profesionalnan, na unda nan tin aworaki 41 supervisor di e Codigo, activo. Un supervisor di Codigo ta posiciona riba un parti di e maneho di loke ta Codigo di Proteccion den su organizacion. Esaki den e cuater sectornan cu e proyecto tin cu ta Husticia, Social, Salubridad, Enseñanza. El a splica cu a traha hopi curativo y awor nan ta purbando di traha mas preventivo y pesey a realiza e “train the trainers” di cual tin 33 cu a caba esaki, door di un Instituto di Hulanda cu ta bin Aruba y ta otorga nan certificacion.
Ras a indica cu aworaki nan ta yegando na e final di e prome etapa di implementacion di e Codigo di Proteccion. For di November 2020 a cuminza cu e lidernan di proyecto, di cual a cuminza prome cu e parti di salubridad y despues cu esun di husticia, y aworaki nan ta trahando riba e rapport pa wak na 2023 na unda ta keda falta. Un di nan cu a haci un presentacion caba ta na scouting. Y awor nan ta bezig cu IBiSA, pa tur e parti di organizacionnan deportivo cu tambe ta bay haya presentacion.
Eseynan tur ta plannan pa 2023 y nan ta cabando cu e profesionalnan. Tocante esun di Enseñanza, Sue-Ann a subraya cu SKOA tine hopi bon hinca den otro. Nan ta leu den e aspecto di implementacion pero tambe den e protocol di Codigo di Proteccion, con nan ta traha cune, na momento cu tin sospecho di abuso di mucha, pues un structura interno, y aworaki nan a cuminza bek na DPS cu ta e scolnan publico. Nan ta canando e caminda ey bek con por implement'e den tur scol publico na Aruba. Pa locual ta crèchenan nan ta bezig cu un protocol cu a keda cla cune. Mayoria di nan a haya, pero tin un parti cu ta keda pa otro aña pa wordo ekipa, y ta bay tin un Supervisor di Codigo pa nan, cu na momento cu nan haya sospecho nan por yama y haya conseho pa wak si enberdad ta un sospecho of no y con por anda cune y actua mas lihe.
Nan ta bezig cu un protocol cu tur e centronan di cuido lo haya, pa nan sa précis kico nan tin cu haci y unda nan tin cu yama.
