Representacion di Corona den Gobierno den un temporada di reto
ORANJESTAD(AAN)- Uno di e informacionnan mas importante cu a alcansa Aruba siman pasa tabata, e decision di Reino pa prolonga e periodo di Su Excelencia Gobernador Alfonso Boekhoudt como e Representante di Corona na Aruba.
Durante uno di e temporadanan mas intenso den e historia di Aruba autonomo den Reino, na varios ocasion tur atencion a wordo dirigi na Gobernador Boekhoudt, kende mester a duna e ultimo palabra.
Señor Juan Alfonso Boekhoudt tabata Ministro Plenipotenciario di Aruba na Hulanda, na momento cu mester a nombra un Gobernador nobo pa Aruba entrante Prome di Januari 2017.
Inicio a wordo duna na e proceso di nombramento den cual a reconoce e Gobierno di e tempo na Aruba. E candidatonan cu a wordo presenta dor di Aruba, no tabata honra exigencianan, cu sigur mester a percura pa e representante di Rey ningun momento a crea impresion di parcialidad politico.
Na Januari 2017 un impase den Reino a wordo kibra na momento cu Gobierno di Reino a nombra señor Alfonso Boekhoudt como Gobernador nobo di Aruba y asina a entrega na su persona, uno di e temponan di reto mas grandi cu Aruba a conoce.
Reforma financiero tabata necesario na Aruba, cu mira e proyecto Citgo fracasa y na man di un Gabinete di Ministro nobo, Gobierno Evelyn Wever-Croes, drenta un periodo financiero nobo den cual responsabilidad tabata e parti central.
Aruba mester a subi un caminda nobo y tur exponente gubernamental mester a duna nan aporte na e loke tabata spera Aruba, cu mester a yega na relacionnan nobo y mas directo cu Hulanda pa asina na inicio di 2020 por a yega na un base pa alcansa un futuro financiero nobo.
Ni Aruba ni mundo tabata prepara pa Covid-19, cu a wordo sigui na 2021 pa e menasa di petroleo y na 2022 pa e Guera di Ukraine.
Den e tempo aki, Aruba a wordo confronta cu reto grandi di investigacionnan cu a tuma lugar entorno posibilidad di corupcion den mundo politico y persecucion penal di politiconan.
Den e cuadro di sucesonan, bista tabata dirigi na varios ocasion directamente riba Gobernador Alfonso Boekhoudt sigur na momento cu mester a dicidi si por huramenta un Miembro di Parlamento, cu tabata den prison.
Sin duda, e respet y confiansa cu Pueblo di Aruba tin pa su Gobernador, no a wordo defrauda, na e forma cu e Representante di Corona den Gobierno di Aruba, a cumpli cu su tarea.
Su Excelencia Gobernador Alfonso Boekhoudt, a entrega prueba di su union cu Pueblo di Aruba den actividadnan cu mucha na e Parke Arikok.
Den practica y retonan grandi, e contenido di trabou di Gobernador di Aruba a wordo expone na Aruba na un forma positivo.
E Representante di Corona na Aruba a duna su propio dimension na e tarea di Representante di Corona na Aruba.
Un tarea cu a wordo cumpli na forma sublime pa nos Prome Gobernador, señor Felipe Tromp, sigui pa señor Olindo Koolman y señor Fredis Refunjol cu a cumpli cu e tarea di honor cu ta suscribi monarquia constitucional na Aruba.
