Mientras cu Speed a pidi disculpa y un chens mas y no castigo di prizon
ORANJESTAD (AAN): Dialuna merdia Nelson ‘Speed’ Cabral de Andrade di 55 aña a presenta den Corte pa e apelacion contra su sentencia di 18 December 2024. Speed a pidi Hof y Procurador General (PG) disculpa pa loke el a haci. El a admiti cu el a haci malo. El a pidi un chens mas y no castigo di prizon. PG ta haya cu Speed a faya dos biaha caba y a exigi mas castigo di prizon.
Mi bay cera mi carera a caba: Ta asina cu tabatin papiamento entre abogadonan mr. Illes, mr. Carl y Procurador General. Ta asina cu Speed ta admiti di ta culpabel pero no kier bay den KIA. Dialuna tratamento di e caso tabata mas bien riba e aspecto di castigo. Speed a bisa Hof cu un castigo di 6 luna di prizon lo bay caba cu su carera. El a bisa cu e tin bon relacion cu Ministerio Publico. El a bisa cu e ta bon cu e vocero Ann Angela, kende segun Speed, e tabata traha cu Ann Angela den corant. Speed a sigui bisa Hof cu e tin bon relacion cu halto mando di Polis y vocero di Polis. El a bisa cu durante e 38 aña den e profesion di medio di comunicacion, el a crea un red di trabao hopi grandi.
Speed a bisa cu e ta admiti di a faya y e kier un chens mas. El a bisa Hof cu comunidad kier haya informacion. Segun Speed, tin competencia y ta presenta situacion caminda bo ta faya. Speed a bisa Hof cu nan medio 24 Ora, ta practicamente esun mas grandi den practicamente Caribe. E presidente di Hof a para Speed di papia.
Hof a puntr’e si ta berdad cu el a cumpra Vos. Speed ta di acuerdo cu e tabata e contacto cu e cosnan aki a wordo haci. El a bisa cu e no kier papia di e caso sino e castigo. El a bolbe pidi Ministerio Publico disculpa. El a bisa cu si e bay 6 luna di prizon, e ta perde tur cos y tin cu cuminsa full di nobo. Segun Speed, tur contract e lo perde.
A haya chens pero toch a faya: Hof a mustra cu den pasado caba Speed a haci e mesun cos. Segun Speed awor el a siña y e no ta haci e cosnan aki mas. Hof a remarca cu apesar cu na 2019 Speed a haya trabao pa comunidad y tempo di prueba di 3 aña, Speed a bolbe haci e mesun cos.
Speed a bisa Hof cu ta papiando cu Comisario di Polis, pa haya radio pa scucha solamente notificacion. Segun Speed, Polis tin mas canal cu lo por usa. Segun Speed, e compania 24 Ora tin un bon relacion cu Polis. El a bisa Hof cu si Polis no kier pa publica algo, 24 Ora no lo haci’e.
Hof a remarca cu pakico awor si Speed ta bisa cu el a siña. Speed a bisa cu el a kere cu door di cubri susesonan, 24 Ora lo bira grandi. El a bisa cu 24 Ora ta number un y esun na di 2 lugar ta hopi leu. Segun Speed, 24 Ora ta scucha pueblo y cu nan ta e intermedio di pueblo cu Polis. El a bisa Hof cu ta pueblo mes ta yama nan pa sucesonan.
PG a exigi mas castigo: Procurador General a bisa Hof cu dia 18 December 2024, Speed a wordo condena na 18 luna di prizon di cual 12 luna ta condicional cu tempo di prueba 3 aña. PG a apela y Speed a apela e sentencia. PG a bisa cu tin palabracion cu abogadonan di Speed, cu lo trata riba e castigo y no bringa riba prueba. PG a bisa cu a apela pasobra ta haya e castigo mucho abao.
El a mustra cu Speed a haci esaki durante su tempo di prueba. PG a mustra cu riba radio di Polis, ta papia di cosnan secreto y door di ta scucha por frusta accion di Polis. El a bisa cu e ta respeta libertad di prensa pero e libertad di prensa tin limite. El a mustra cu tin articulo 10 di EVRM (Ley di Derechonan Humano na Europa) cu ta mustra esaki.
PG a bisa cu Speed su interes tabata pa ta promer den noticia compara cu concurencia. Dos aña largo Speed tabata scucha radio di Polis pa su propio interes. PG a sigui bisa cu Speed tabata scucha tur combersacion di Polis y esaki ta viola e confianza den pueblo den Polis. PG ta haya cu Speed ta culpabel. Na opinion di PG, a scucha Speed bisa diferente biaha sorry, pero no ta mira kico e kiermen cu esey. El a mustra cu Speed a haci e delito aki den su tempo di prueba. PG a mustra cu e castigo di Speed ta mas halto compara cu e otronan cu a wordo condena pa scucha radio di Polis.
PG a exigi pa confirma e sentencia pero a subi e castigo na 18 luna di prizon di cual 6 luna ta condicional cu un tempo di prueba di 3 aña. Esey ta nifica cu Speed lo mester bay 12 luna di prizon si Hof confirma e exigencia di PG.
Abogado ta propone otro castigo: mr. Carlo a bisa Hof cu Speed ta admiti pero ta haya e castigo ta di mas. El a pidi Hof pa mantene e 18 luna di prizon condicional y pone trabao pa comunidad. Di e forma aki ta pone presion riba Speed durante 3 aña y si e bolbe faya e lo mester bay 18 luna sera. Abogado a bisa cu Speed di 55 aña, no a sigui curso di periodismo. E tabata sigui tur anochi accidente. Den e trayectoria di 38 aña, tur hende conoce Speed pasobra e tabata e promer na incidentenan. Door di e gana di ta e promer, Speed a haci e fayo aki.
E abogado a bisa Hof cu e compania 24 Ora ta e medio mas grandi na Aruba y Speed ta un di e directornan. Speed ta traha di curason pa su trabao y ta cuida su mama. Na opinion di abogado, na Merca e tipo di noticianan aki ta normal y ta en bibo di Polis. Abogado ta kere cu tin gradonan di secreto. El a bisa cu mayoria di e casonan cubri pa e compania, ta bin den Corte. Na opinion di abogado, e secreto ta e momento ey. Despues di algun minuut e ta conoci. E abogado a bisa cu esey ta otro cu documentonan di casonan penal.
E ta haya cu e scuchamento di radio di Polis ta secreto di ultimo grado. El a mustra cu Team di Aresto ta traha riba otro canal y mesun cos Recherche. E abogado a expresa cu Prensa ta e cacho vigilante di pueblo. Pero si e cacho no por yega, con pueblo lo haya sa! Segun e abogado, Speed no tabata haci esaki pa su mes sino pa pueblo. No tin excusa cu Speed a bolbe haci e mesun cos. Tin competencia di otronan y pesey Speed no tabata mira e fayo.
E recidivista di Speed no tin discusion y pesey a haya 6 luna. E abogado ta haya cu e castigo demasiado. E abogado ta haya cu e castigo cu el a propone esta 18 luna di prizon condicional y 240 ora di trabao pa comunidad lo ta na su lugar. Sin castigo di prizon. El a bisa cu promer e tabata 6 luna condicional pero aki ta 18 luna condicional. Na opinion di e abogado, awor Speed a siña. E ta pidi Hof pa duna Speed un di tres chens.
PG a reacciona cu Ministerio Publico no tey pa haci Speed su bida zuur. Hecho ta cu Speed tabata scucha radio di Polis cu ta destina pa Polis. El a mustra cu tin informacion cu mester ta pa Polis y Speed ta manda esaki den publicidad. PG a mustra cu e polis a viola su obligacion di secreto di Polis y pesey a haya castigo combina y a perde su trabao di Polis.
Hof a bisa cu ta bay studia e caso y dia 17 November 206 pa 1.30 di merdia nan lo tin sentencia.
