Glenn Thode, Presidente di Conseho Electoral
ORANJESTAD (AAN): E proceso di e emtregamento di listanan politico a bay basta bon. Esey ta e conclusion cu por a scucha diabierna atardi for di e presidente di e Conseho Electoral Glenn Thode y for di Sharin Luydens, Directora di Registro Civil y Censo.
Nan ta masha satisfecho con tur cos a cana. Diesdos partido politico a haci entrega di nan lista di candidatonan y tur cos a sosode segun e rekisitonan cu ley ta prescribi.
Pa 4:00 pm a cera e proceso di entrega di lista. Esaki a inicia 9or di mainta. Cada partido mester a cumpli cu rekisitonan legal manera entre otro grandura di e potret di cada candidato, nombernan corecto, etc.
Segun Thode, tabata tin algun partido cu mester a bay y bolbe bek pa djis coregi algun detaye. Pero tur a haya oportunidad pa haci coreccion den caso cu tabata necesario, a bisa.
E dia a bay trankil y e partidonan a cumpli cu e rooster. Relaciona cu e situacion di e pandemia, a evita cu por tabata tin basta hende rond di Censo, ya cu esaki tambe a funciona manera normal. te hasta bruid tabata tin, Glenn Thode a indica.
Sharin Luydens di su banda a expresa cu e ta basta satisfecho con e proceso a bay.
Dialuna a inicia e siguiente stap cual ta e recoleccion di firma pa e 8 partidonan cu aworaki no tin asiento den Parlamento. Pa esaki mester di un minimo di 587 firma.
Cada firma lo mester wordo haci riba papel, Luydens a remarca.
Finalmente, por bisa cu riba diabierna tur cos a cana bon y awor e 12 partidonan por pasa pa e di dos fase. Tur a presenta tur cos na ordo, e presidente di e Conseho Electoral a señala.
A controla e listanan superficialmente. Pero pesey awor tin un proceso pa analisa tur cos y e partidonan lo por haya un carta pa haci coreccionnan si mester, a agrega.
Despues di esey tur cos lo ta cla pa 25 di Juni 2021, Thode a duna di conoce.
==
