Hose Figaroa di FTA:
*Ley tambe ta atende cu termento na trabao
ORANJESTAD (AAN): Presidente di Sindicato di Trahadonan FTA, Hose Figaroa, a indica cu termento (bullying) na pia di trabao ta un problema cu aworaki ta poniendo mas atencion na dje.
Ta algo cu semper tabatey, pero aworaki door di e cambionan den e legislacion laboral unda cu e tipo di cosnan aki ta wordo regula, ta haya cu mas atencion ta wordo poni na dje. Pesey FTA a scoge tambe pa habri nan congreso c'un charla di psicologo pa trece un tiki luz riba e fenomeno aki cu ta tuma luga y cu no ta na su luga tampoco, Figaroa a duna di conoce.
El a sigui bisa cu "e ambiente na pia di trabao mester ta un ambiente unda cu logicamente un dunado di trabao kier pa un trahado produci na e miho forma posibel. Pero na momento cu tin cierto situacionnan asina ta tuma luga na trabao, esey no solamente ta negativo pa e trahado mes, y negativo pa e empresa tambe".
Hopi biaha e problemanan aki no ta solamente di gerencia, pero hopi biaha tin problema den 'middle management' manera supervisor, gerentenan, cu no ta trata na e miho manera. Hopi biaha tin'e tambe entre colega cu colega, a splica. Pa e trahado no ta conveniente pa traha den un ambiente asina.
E ultimo cambionan den ley laboral a tuma lugar na 2021 y eyden tin cierto articulonan cu ta regarda e asuntonan aki unda un dunado di trabao tin e obligacion pa ofrece un ambiente bon pa e trahado traha aden.
Pero loke ta haya hopi biaha ta cu e trahado, e mes no por identifica cu cierto cosnan ta tuma luga y no por takel e problema.
E charla cu cual FTA ta bay su congreso ta uno cu tambe ta wordo duna na pia di trabao tambe. E intencion ta pa e trahado ta mas consciente di si e mira cu esaki ta sosode na trabao y por reconoce e señalnan cu esey ta locual ta tuma luga na pia di trabao, cu e por bati alarma. E por acerca FTA of bay na e empresa mes y bisa cu algo no ta bon y cu e ta sinti cu e manera di traha no ta bon, cu tin colega of cu tin superiornan of coleganan ta trata mi na un manera incorecto.
E idea tras di e charlanan aki ta pa haci e trahado consciente riba su derechonan y cu por identifica ora e cosnan aki di 'bullying' ta tuma lugar, Hose Figaroa di FTA a remarca.
El a agrega cu e trahado mes no ta consciente di loke ta pasando y meld. FTA y Departamento di Labor tin hopi trabao y casonan pa atende pero esey no kiermen cu mester ignora e problemanan aki como cu nan tin un efecto riba e trahado y riba e empresa.
"Un trahado cu bin c'un keho asina pa insignificante cu e por mustra como dunado di trabao bo tin cu takel'e. Y e tendencia ta cu e cosnan aki cu tempo ta bira pio", a bisa.
Si no frena e practicanan aki na pia di trabao cu tempo ta bira pio y bay haya trahadonan cu por ta ta bay kita fo'i trabao, pero por haya situacionnan mas grave manera cu e trahado ta cay den depresion.
