Na 2022 cambio di clima y energia lo sigui enfrenta otro --- *Acuerdo di clima ta peliger pa inversion petrolero mundial --- *Pronostico di horcannan mas fuerte enfrente combustibel
ORANJESTAD(AAN)—2022 a hereda un cantidad di asunto crucial cu pa hopi tempo por a wordo pospone dor di mundo.
Na 2022 cambio di clima y e problemanan cu e lo representa ta enfrenta un mundo caminda energia a bira e comodidad cu a conoce e aumento mas importnte na 2021.
Cifranan ta mustra con prijs di energia, cu ta necesario pa funcionamento di comunidad, a subi cu mas cu 50 porciento despues cu Covid-19 na 2020 a baha resultadonan.
Na 2020, Covid-19 a baha e necesidad di transportacion riba tur tereno. Esaki a haci cu e necesidad pa combustibel tambe a cay loke a afecta e sector di energia, cu na 2021 a conoce un aumento di raket.
Na mes momento na 2021 mundo a reuni na e Conferencia di Clima, caminda palabracionnan a wordo haci cu ta afecta e sectornan di gas y petroleo.
Na 2022 mundo mester realisa e palabracionnan cu a wordo haci pa loke ta trata reduccion di uzo di gas y petroleo y awor loke ta teoria mester bira practica.
Ya pa basta tempo diferente metodonan nobo pa genera energia a cuminsa mira luz den proyectonan, cu awor mester bira realidad.
Mundo mester cuminsa reemplasa gas y petroleo mas y mas y esaki lo tin un impacto grandi pa paisnan productor di petroleo, cu ta dispuesto pa sigui haci inversion grandi y importante rond mundo na 2022, pero cu no kier pone nan placa na riesgo.
Bista ta dirigi riba paisnan di OPEC+, cu proximamente ta bolbe reuni pa dicidi kico nan ta bay haci cu produccion di petroleo cu lo dicidi riba loke lo afecta e prijs di petroleo y asina e prijs di transportacion, di awa y coriente mundialmente.
E resultado di e aumento di prijsnan di energia tabata tin impacto serio pa paisnan, cu mester dicidi kico nan ta bay haci.
Na New York, cu ta centro di inversionistanan, 2022 a habri cu ponencia cu e cambio di clima lo nifica horcannan mas pisa pa e ciudad.
E mensahe aki a bini dilanti tambe na Inglatera cu a papia di e intensidad creciente di tormentanan cu lo tin resultado serio pa mundo.
Na mes momento e paisnan ta conciente cu prijs di energia ta azota poblacion sigur den e tempo di pandemia y e temporada friu.
Mientrastanto companianan nobo riba loke te awor tabata wordo yama “energia alternativo” ta presenta nan mes pa trece energia mas limpi.
Esaki ta trece cune cu negoshinan nobo ta mira luz mundialmente mientras companianan existente ta cuminsa adapta nan mes na e realidad nobo.
Ta keda e periodo di transicion cu ta bira e periodo di mas dificil sigur si tene na consideracion e tempo cu a resta pa den situacionnan financiero dificil causa pa e pandemia Covid-19, paisnan haci e inversionnan necesario pa bandona petroleo y gas pa introduci energia limpi.
Clima y energia ta uno di e topiconan cu DIARIO na 2021 a presenta ampliamente na Aruba cu lo keda informa na 2022.
