Parlamentario Hendrik Tevreden:
ORANJESTAD (AAN): Diamars 27 den parlamento di Aruba a trata e presupuesto di The Tourism product Enhancement Fund (TPEF) cu mester a wordo trata inicialmente dia 13 di februari.
E rason cu a trat'e asina laat ta pasobra oposicion di MAS, y AVP no kier a duna 'quorum'. Pa un reunion cuminsa mester tin 11 o mas miembro presente y pa e reunion aki, tawata tin 14 miembro cu a firma, pues presente, pero no kier a duna 'quorum' pasobra dos miembro di coalicion cu rason valido a indica cu nan lo ta yegando un poco mas laat.
Esaki sigur ta un actitud infantil di oposicion cu e intencion pa stroba gobierno di ehecuta un bunita proyecto turistico na San Nicolas.
Fraccion di MEP tabatin y a haci diferente pregunta na Minister di Turismo ariba TPEF, entre otro dicon e beach di Eagle Beach ta sushi. Hopi di esnan cu ta campa ya caba a cuminsa bishita e area y nan kier pa e beach ta limpi.
Nan mes a cuminsa haci limpi, pero mester di ayudo di e ploegnan pa logra esaki completamente.
Parlamentario Hendrik Tevreden, Lider di Fraccion di MEP a indica: "Mi a pidi Minister di Turismo pa e interveni cu DOW pa controla esaki y puntra e ploegnan pasa o aumenta e dianan cu nan ta pasa pa mantene e area limpi. Kiermen mi ta sali fo'i e punto di bista cu pa e campamento aki, e area aki lo mester ta limpi pa esnan cu lo haci uzo di esaki.
Proyecto di San Nicolas nobo
Tevreden a sigui bisa cu e pretexto di Sra. Lopez -Tromp pa hustifica dicon e no tawata den sala concientemente tawata pasobra e no a firma acuerdo di gobernacion na Toren di Lighthouse entre Raiz y MEP.
Lubidando cu el a huramenta 'naar eer en geweten' pa traha pa Pais. Y e postura aki a haci cu e proyecto pa San Nicolas awe ta conoce un retraso pasobra ta tuma mas tempo awor pa por prepara pa e pago y ehecucion.
"Sinembargo nos tin di remarca cu e proyecto pa San Nicolas no lo wordo para, pasobra nos ta kere cu e ta positivo pa e comunidad en general.
Ta pa hopi tempo nos tabata pensa ta con por crea un fluho grandi di hende den centro di San Nicolas. Porfin cu esaki nos a logra di cuminsa", e parlamentario a agrega.
Den e presupuesto di TPEF 2024 tin Afl 350 mil pa e proyecto di World War II Memorial. Ta trata di un monumento y ruta mara na dje pa turista por bishita den gran escala den e area. E lo bira un monumento cu lo enfoca riba e papel crucial cu Aruba a hunga den WWII pa a duna 'fuel' na avionnan Mericano cu tawata sostene e flotanan aliado contra e alemannan.
Aruba a wordo bombardea pa e alemannan e tempo ey. Nos pueblo a pasa momentonan di hopi tension. Hendenan a perde nan bida. Aruba tawata scur pa dianan y ohala cu algo asina no ripiti mas. Sinembargo awe nos ta bira un tragedia den un oportunidad unda cu e pueblo lo por beneficia di dje grandemente, Hendrik Tevreden a remarca.
E proyecto tin diferente fase, y den fase 2 di e proyecto lo brinda un 'walking tour' na e bishitantenan y despues di basha parti di e muraya di refineria abou, e bishitante por mira loke a resta di e refineria cu a produci e 'fuel' contribuyendo na victoria di forsanan aliado y fin di WWII.
"Nos ta positivo cu esaki lo significa un fluho di bishitante grandi y constante den centro di San Nicolas. Cual bo por pensa cu lo yuda e comerciantenan existente, pero tambe esnan cu kier cuminsa cu negoshi.
Djis imagina bo centro di San Nicolas tur mainta cu yen di hende ta cana. Pa mira muralnan, WWII proyect, y djey pasa come of bebe algo rond. Cumpra un 'souvenir' di artesanonan, y djey sigui cu nan tour. Eynan nos ta bayendo y e direccion aki ta positivo. E proyecto aki ta mustra simpel, pero e efectonan por ta grandi, djis pensa con nos Palm Beach strip a cuminsa.
Den sala mi a haci e petición pa miembronan carga nan responsabilidad, no purba na tranca reunionnan, pasobra no ta gobierno bo ta logra tranca, bo ta stroba e proceso di nos Pais", Parlamentario Hendrik Tevreden a finalisa bisando.
