ORANJESTAD (AAN): Diamars atardi porfin a yega asina leu, cu Ministro di Finanzas a haci entrega di e Presupuesto 2022 pa pais Aruba.
Esaki a wordo entrega den forma digital, completamente warda riba un USB Memory Stick fini, y a ser entrega na President Edgard Vrolijk. Riba e USB Memory Stick aki cu bo por warda hasta den bo cartera di un tamaño di carchi di banco, ta inclui tur info y conseho di pais Aruba. Tur parlamentario lo ricibi un memory stick cu tur informacion.
Presidente di Parlamento Edgard Vrolijk hunto cu griffier ta bay percura pa hinca e tratamento di e presupuesto aki den reunion publico proximamente, aunke nan schedule ta bastante ocupa e dianan aki.
Ministro Xiomara Maduro a bisa cu ta importante pa duna kico ta cifranan cardinal di presupuesto 2022 pa pais Aruba. Na comienzo di aña caba a duna conferencia di prensa pa indica e puntonan mas importante.
Cifranan di Presupuesto: Ministro Maduro a bisa, cu pa loke ta e Entradanan premira, esaki ta yega na 1.275 miyon florin. Pa Gasto tin premira 1.566 miyon. Esey nifica cu Gobierno lo core cu un Deficit financiero e aña aki di 291 miyon florin, cu ta equivalente di 5.2% di GDP.
E aña aki e necesidad financiero ta core den 1.305 miyon Florin y aki ta importante pa sa cu e gastonan mas cardinal den esaki, ta e gasto di personal cu ta 438 miyon Florin, gasto pa servicio di producto cu ta 226 miyon Florin, gasto pa interest ta 266 miyon Florin, gasto pa subsidio ta 112 miyon Florin, y entradanan por menciona cu e Impuesto directo premira lo ta 481 miyon Florin, y Impuesto indirecto ta wordo premira na 551 miyon Florin.
Ministro Maduro a bisa cu gasto di Inversion ta conta cu 37 miyon Florin, y gasto di Enseñanza pa Estudio ta 26 miyon Florin.
E necesidad financiero pa Aruba e aña aki pa gasto cu tin di haci pago den exterior, esta e debe externo, e biaha aki cu yudanza di Hulanda a ricibi suma aña pasa, y pa 2022 tambe lo ricibi esey pa yuda ‘cubri’ esey.
E Debe internacional cu Aruba tin pa paga den 2022 ta 346 miyon Florin. Pero e suma aki conforme cu loke ta e acuerdo cu Hulanda, Aruba lo ricibi e suma aki pa por cubri’e.
Otro suma den e aña aki di necesidad financiero, tin e suma di debe cu Aruba a acumula pa e yudanza cu Hulanda a brinda durante e pandemia, cu ta core den 904 miyon Florin. Riba esaki ainda Aruba ta deliberando cu Hulanda pa sa con ta bay atende cu e parti aki.
Pa e debe local, riba presupuesto ta poni un gasto di 110 miyon Florin, y conforme palabracion cu Hulanda, esaki lo wordo financia riba mercado local.
E deficit di 291 miyon, esaki e ora tin di bay via sosten di liquidez di Hulanda. Ministro a bisa cu si acaso no logra esaki, lo tin di bay cune e ora riba mercado local.
Tur esaki nifica cu sigur pa loke ta e necesidad financiero, Aruba ainda ta depende di Hulanda y esaki tambe ta trece cune den discusionnan pa cu condicion poni door di Hulanda pa e fianza, awor den e presupuesto tambe Parlamento por bay debati riba e parti aki, y mira cu tin condicionnan y cu e isla tin mester di e yudanza di Hulanda, y pesey e ora mester cumpli cu e condicionnan cu tin poni.
President di Parlamento a ricibi e USB Memory Sticks y lo percura pa tur Parlamentario haya uno den nan man.
