Tocante e carta di e lidernan di MAS y Accion 21: - *Pero e kier presencia di Minister Lampe!
ORANJESTAD (AAN) – Den forma di pregunta-contesta, Parlamentario y Presidente di Parlamento Edgard Vrolijk a hiba cu participacion, den e conferencia di prensa di fraccion di Movimento Electoral di Pueblo (MEP), Diahuebs mainta dilanti di Parlamento.
E pregunta cu el a haya tabata tocante e carta cu lidernan di Partido MAS y Partido Accion 21, Marisol Lopez-Tromp y Miguel Mansur, respectivamente, a manda pa su persona como Presidente di Staten.
Vrolijk a bisa cu enberdad diamars el a ricibi un carta cu el a firme y mande pa Prome Minister, wak si e ta bin pariba y ki fecha, pasobra e no por yama un reunion cu Minister Presidente, si e no tey.
Pero tambe el a manda puntra di biaha esnan cu a haci e peticion cu tabata señora Lopez-Tromp y señor Mansur, pasobra constitucionalmente tin un eror grandi, mirando cu Prome Minister no ta responsable pa e cartera di enseñanza.
E Minister di Enseñanza (demisionario) ta esun responsable. Edgard Vrolijk a subraya cu el a puntra e parlamentarionan concerni, y nan ta keda insisti, pesey el a manda puntra Prome Minister e fecha cu e ta bin pariba.
Vrolijk a reitera cu den su concepto e peticion ta eroneo y constitucionalmente e carta mester bay pa e minister cu ta responsable di e cartera di enseñanza. El a agrega cu nan por yama Minister Presidente pero e no tin e autoridad pa kita cierto decisionnan cu e otro minister a tuma.
El a subraya cu un di e parlamentarionan cu a haci e peticion a sinta como Minister di Enseñanza y e sa tambe e posicion cu un Minister Presidente tin, cu ta un “bijzondere positie” (posicion special) den un gobierno, unda cu e tin autoridadnan mas leu ainda cu cualkier minister.
Edgard Vrolijk a señala cu den calamidad por ehemplo, e por exigi pa para cierto proyecto, hasta construccion di scolnan.
“Esey mi a bisa nan y nan a contesta mi cu nan ta sigui insisti pa e Prome Minister, y naturalmente, como Presidente di Parlamento mi a manda e peticion pa Prome Minister y a puntre ki dia e ta bin ariba”, Edgard Vrolijk a reitera.
Vrolijk a comenta cu el a haci su trabao y e ta den spera di e contesta di Minister Presidente, y e tin intencion tambe di yama e reunion, y ta spera tambe e presencia di Minister Lampe, cu ta esun encarga cu e cartera di enseñanza, indicando cu e tambe por yame na e reunion, pero ta keda na e fraccionnan tambe pa hacie, pa responsabiliza su mes. E ta kere cu e minister aki tanten cu ta sinta den e stoel ta hopi daño e ta keda haci. “Mi ta pidi e fraccionnan tambe pa nan por sinta hunto pa nan haci un peticion tambe, pa Minister Lampe responsabiliza su mes. Esey ta para duidelijk den e Constitucion, cu e Minister responsable pa Enseñanza ta Minister Lampe”, Vrolijk a remarca.
E presidente di Staten a bisa cu su politica den parlamento ta cu inmediatamente cu drenta un peticion pa un reunion cu un minister, e ta haci su trabao y ta mande na e minister corespondiente y ta wak ki dia e minister su fecha ta disponible.
