ORANJESTAD (AAN): Durante un ceremonia special pa instalacion oficial di 2 Huez nobo, y tambe Procurador General pa Aruba,
teni den Renaissance Convention Center, tabata presente e.o. Gobernador, Prome Ministro, y diferente digantario y funcionario hudicial di e isla.
Na e ocasion aki cu a instala e Procurador General nobo pa Aruba, esta mr. Amalin Flanegin, el a wordo introduci door di President di Corte Comun di Husticia, esta mr. Maurits de Kort.
El a bisa cu mr. Flanegin a nace na Aruba, ta mama di Annabelle y Amberlee, y a studia na Universidad di Antiyas Hulandes y Universiteit Leiden, unda na 1987 el a obtene su doctoraalbul (Masters Degree). Despues di algun funcion oficial, e tabata di 1994 te 1996 laborando na Hof di Husticia di Antiyas y Aruba. Despues el a yuda lanta e Departamento di MOT (Meldpunt Ongebruikelijke Transacties), cu awendia a bira e Financial Intelligence Unit (FIU).
For di 2002 te cu 2007, el a labora como Fiscal pa Ministerio Publico na Aruba. Despues pa cuatro aña el a traha como Abogado cerca su mesun practica. Na 2012 el a cuminza como Divisiemanager Toezicht en Handhaving, y consehero di e Directiva Diario di Banco Central di Aruba. Desde 2002 e ta un specialista certifica den anti-labamento di placa, y aña pasa el a wordo nombra door di Conseho di Ministro di Reino desde 1 September como Procurador General pa Aruba.
Loke coleganan ta bisa: President mr. de Kort a trece dilanti tambe loke demas coleganan den Husticia ta comenta di mr. Flanegin desde cu el a bin na cabez di Ministerio Publico.
Na prome lugar, nan ta mira un PG hopi envolvi y activo. Pais Aruba y Ministerio Publico como organizacion ta cerca di su curason. E ta dispuesto y ta capaz di hala su mes un banda si acaso ta cay na interes di Aruba y Ministerio Publico. E ta hopi envolvi cu e hendenan den tur nivel di e organizacion y ta papia regularmente cu nan tur ora cu e cana den pasiyonan. E tin atencion pa e ser humano.
E ta legalista. E ta check constantemente e leynan of convenionan, richtlijn, y instruccionnan prome cu e reacciona riba algo. E ta lesa tur cos tambe.
Banda di esey, e ta hopi skerpi den discusionnan. E ta esnan cu ta sigui busca follow-up. E ta vigila tur elementonan di accion pa asina keda sigui cu recordatorionan te ora cu e punto wordo soluciona. Nada ta scap’e, y pesey, nada ta prolonga inecesariamente tampoco.
E tin gran balor pa sigui profesionalisa e organizacion. Esaki ta cuminsa cu estableicmento di un baon base registrando e procedimentonan y sintando asina e basenan pa continuidad. Esaki ta dirigi riba e futuro pa e momento ora cu e no tey mas como PG relaciona cu cumplimento di edad di pensioen cu e lo por yega na dje. E trabao como PG lo bay ta probablemente su ultimo trabao.
E compromiso cu e continuidad ta refleha tambe den e energia cu e ta hinca den e plan nobo di formamento y un presupuesto independiente pa Ministerio Publico.
Traha di dia y anochi: Pa por logra su metanan, segun mr. de Kort, tin biaha ta parce cu mr. Flanegin ta traha di dia y anochi. Den cualkier caso, e ta e prome persona (despues di e empleado di CEA) cu ta yega oficina mainta, y hopi biaha, e ta e ultimo cu ta regresa cas. Su energia parce di casi no tin limite
- Flanegin tin hopi importancia na e bon relacionnan cu e socionan di Ministerio Publico, manera Corte, Cuerpo Policial, y demas servicionan. E tin tambe un bon sentido di humor.
Tur esaki ta converti mr. Flanegin den un balioso PG y un agradable colega.
President mr. de Kort a desea Amalin hopi sabiduria, consistencia y perseverancia, y ta spera un colaboracion fructifero, tambe cu PG di demas islanan di Caribe, esta mr. Schoop cu tambe tabata presente.
Mesun deseo tambe, mr. de Kort a manda pa PG mr. Schoop, “pa e seguridad di nos islanan, abo y sra. Flanegin tin cu bati cabes hunto, sin kibra cabes di otro.”
El a bisa cu awor a marca un etapa bunita den cual e ta yama ‘E Caribisacion di poder hudicial riba e islanan.” Cu Amalin, e hefenan di magistratura di partinan Caribense di Reino, tur tres ta bin di islanan mes.
E tres habitantena di Reino (mr. de Kort, mr. Flanegin, y mr. Schoop) a ricibi nan formamento y educacion na Hulanda, pero principalmente tambe riba e islanan. E sistema di enseñansa a yuda nan cu esey. Pues e no ta asina malo manera tin biaha algun hende ta vocifera. Pero na mesun momento, e reto constante ta pa actualiza y mantene actualisa e educacion y formamento di nos hobennan. E modernisacion y actualizacion ta un actividad continuo.
