Aruba Food and Beverage Association ta activo buscando alternativa o solucion
- E falta di empleado den sector di Alimento y Bebida ta serio
ORANJESTAD (AAN): Durante e ultimo lunanan cu a pasa Aruba Food and Beverage Association tabata activo den diferente reunion cu Ministerio di Labor, y instancianan cu ta encarga cu personal y permisologia pa personal extranhero. A informa e diferente instancianan e problematica cu e sector ta experimentando pa haya personal. Tin oido pero nos como Asociacion cu ta defende su miembronan y bienestar en general di Aruba ta spera un compromiso mayor.
Manera ta conoci, AFBA a organiza pa 2 aña consecutivo un job fair pa ofrece oportunidad tanto pa studiante cu ta buscando trabao den Horeca como tambe na su miembronan cu kier a ofrece trabao. En general por bisa cu e Job Fair tabata exitoso pero no por a cubri e faltante di personal califica den e area di Alimento y Bebida. Pa e aña aki lo repeti e Job Fair na luna di Juni, pa ser mas exacto dia 12 di Juni. E job Fair aki ta importante ya cu e miembronan di AFBA kier evita di tin cu cuminsa cu un proceso di solicitud of trece empleado di exterior.
Na e momento aki mayoria di e miembronan tin problema pa haya empleado arubiano of cu ta biba na Aruba. Riba diferente website, inclusive esun di AFBA cual ta www.arubafoodandbeverage.org por haya diferente posicion habri continuamente. Cual posicionnan no ta ser cubri y por conclui cu tin poco personal disponibel pa labora den e industria aki na nos isla.
Aña pasa a cuminsa cu un program piloto cu OAA Openbare Avond Leergangen Aruba, pa ofrece cuponan di studio y practica, unda e studiante tin oportunidad di sinja y traha a la vez cerca nos miembronan. Na e momento aki e studiantenan ta den nan fase final. E job Fair y studio piloto aki ta esfuersonan cu AFBA ta haci pa por logra supli e necesidad di personal.
A nota cu Aruba Tourism Authority a presenta e plan de mercadeo di 2024, y por a a destaca cu ta papia di un proyeccion di crecemento pa e siguiente añanan pa e turismo di Aruba. Adicionalmente, a ser recalca riba e aspecto di un crecemento exponencial di uso di alohamento alternativo na Aruba pues, cu esaki ta mustra cu ta spera cu nos industria lo mester supli alimento y bebida na e bishitantenan aki y ademas esnan cu ta alohando den hotel tradicional y na e pueblo di Aruba. Mester adiciona e hecho cu na Aruba tin un stop na All Inclusive Hotels. E crecimientonan proyecta ta positivo y favorable pa e industria y e miembronan tin infrastructura y capacidad financiero pa por supli e necesidad aki semper y cuando por haya personal pa atende y duna un servicio obitimo y servicial.
AFBA ta buscando alternativo y solucion pa su miembronan, den e marco aki nos ta planeando dia 15 di februari un Foro na La Cabana Aruba Beach Resort pa 11:00 am pa asina mediante un panel cu SVb, Dimas, DPL y Ministerio pa duna nos miembronan e oportunidad di intercambia ideanan, vocifera e frustracion of obstaculonan cu nan ta hayando pa opera den forma adecua.
E asociacion ta spera cu na final di e Foro por conclui algun adelanto referente empleo di mas persona na Aruba pa por desarolla e industria di Food and Beverage na nos isla den un forma sostenibel, corecto y sano pa e comunidad di Aruba y su bishitantenan.
